Чет элда яшаётган пенсионерларга пенсия тўловининг тўхтатиб қўйилиши таҳририятимизга келаётган саволларни кўпайтириб юборди.
Вазиятни «Норма» эксперти Зафаржон Хўжаев тушунтиради.
– Таъкидлаш керакки, бундай ҳолатда кўпчилик ўйлагандек пенсионер пенсиядан маҳрум қилинмайди, балки унинг тўлови тўхтатиб турилади. Чунки пенсионер Ўзбекистон Республикаси ташқарисига чиқиб, 3 ойдан ортиқ вақт мобайнида келмаганида, белгиланган пенсия тўлови тўхтатиб турилади (Низом 159-б., 13.10.2022 йилдаги 592-сон ВМҚга илова, кейинги ўринларда – 592-сон Низом).
Бунинг олдини олиш учун, кекса ёшдагилар яшаётган мамлакатидаги Ўзбекистоннинг дипломатик ваколатхонаси ёки консуллигида ишончнома расмийлаштириши керак бўлади. Шунингдек, доимий яшаш фактининг йўқлиги ва ушбу давлат ҳудудида пенсия ёки ижтимоий нафақа олмаганлигини тасдиқлаш керак.
Ишончномага ушбу ҳужжат расмийлаштирилган давлатнинг ваколатли органи томонидан апостиль қўйилиши лозим, бундан МДҲга аъзо давлатлар, Фуқаролик, оилавий ва жиноят ишлари бўйича ҳуқуқий ёрдам ва ҳуқуқий муносабатлар тўғрисидаги Конвенция (Минск, 1993 йил 22 январь) иштирокчилари мустасно.
Ишончномани расмийлаштиришга кечикмаслик керак, чунки уни чиқиб кетгандан кейин 3 ой ичида расмийлаштириш зарур.
Эслатиб ўтамиз, ишончнома берган шахс Пенсия жамғармасининг бўлимларидан бирига бир йилда камида бир марта келиб тайинланган пенсияга бўлган ўз ҳуқуқини тасдиқлаши керак. Ишончнома пенсияни етказиб бериш (топшириш) юкланган ташкилотнинг бўлимида сақланади. Бунда бўлинма ишонч билдирилган шахс томонидан ишончнома тақдим этилган санадан бошлаб 10 кун муддатда Пенсия жамғармасининг тегишли бўлимига пенсияни етказиб бериш (топшириш) юкланган ташкилот бўлинмасининг асосий муҳри ва раҳбарнинг имзоси билан тасдиқланган ишончнома нусхасини юбориши шарт (592-сон Низом 147-б.).
Пенсионерга ҳисоблаб чиқариб қўйилган, лекин унинг томонидан ўз вақтида талаб қилиб олинмаган пенсия пули пенсияни олиш мақсадида мурожаат этилган санадан Қонуннинг 59-моддасида белгиланган муддат асосида тўланади.
Агар пенсионер ишончнома расмийлаштира олмаса, унинг томонидан ўз вақтида талаб қилиб олинмаган пенсия суммалари пенсияни олиш мақсадида мурожаат этилганидан олдинги 24 ойдан ошмаган давр учун тўланади (592-сон Низом 156-б.).
Маълумот учун!
Пенсия белгилаш учун паспорт ёки чет элга чиқиш учун биометрик паспорт ёхуд ID-карта, яшаш учун рухсатнома ТАҚДИМ ЭТИЛАДИ.