Ўзбекистон Республикаси Вазирлар Маҳкамасининг қарори
Сўнгги йилларда аҳолини тадбиркорликка жалб қилиш, тадбиркорлик ташаббусларини амалга ошириш учун қулай ҳуқуқий, иқтисодий ва ижтимоий шарт-шароитлар яратиш борасида кенг кўламли ишлар олиб борилмоқда.
Бу борада Ўзбекистон Республикаси Савдо-саноат палатасига унинг фаолияти самарадорлигини ошириш ва такомиллаштириш мақсадида бир қатор янги ваколатлар берилди.
Ўзбекистон Республикаси Президентининг «Савдо-саноат палатаси фаолиятини янада такомиллаштириш бўйича қўшимча чора-тадбирлар тўғрисида» 2023 йил 23 январдаги ПҚ-15-сон қарорида белгиланган мақсадларга эришиш ҳамда Ўзбекистон Республикаси Савдо-саноат палатаси тизимини янада такомиллаштириш орқали унинг фаолияти самарадорлигини ошириш мақсадида Вазирлар Маҳкамаси қарор қилади:
1. Ўзбекистон Республикаси Ҳукуматининг иловага мувофиқ айрим қарорларига қуйидагиларни назарда тутувчи ўзгартириш ва қўшимчалар киритилсин:
давлат органлари ва идоралар томонидан тадбиркорликка оид барча беғараз кўмак лойиҳаларини амалга оширишда Ўзбекистон Республикаси Савдо-саноат палатаси (кейинги ўринларда – Палата) лойиҳа ҳамкори сифатида жалб қилиниши;
Ўзбекистон Республикаси ҳудудида халқаро грант лойиҳаларини амалга оширишда Палатага миллий ҳамкор бириктириш талаби қўлланилмаслиги;
Палата ҳузуридаги Тадбиркорликка кўмаклашиш марказлари тугатилиб, уларнинг ўрнига Палатанинг туман (шаҳар) бўлимлари ташкил этилаётганлиги.
2. Мазкур қарорнинг бажарилишини назорат қилиш Ўзбекистон Республикаси Савдо-саноат палатаси раиси Д.А.Вахабов зиммасига юклансин.
Ўзбекистон Республикасининг Бош вазири
А.АРИПОВ.
Тошкент ш.,
2023 йил 29 май
217-сон.
ЎзР ВМнинг 2023 йил 29 майдаги 217-сон қарорига
ИЛОВА
ЎЗБЕКИСТОН РЕСПУБЛИКАСИ ҲУКУМАТИНИНГ АЙРИМ ҚАРОРЛАРИГА КИРИТИЛАЁТГАН ЎЗГАРТИРИШ ВА ҚЎШИМЧАЛАР
1. Вазирлар Маҳкамасининг 2017 йил 9 февралдаги 66-сон қарори билан тасдиқланган Тадбиркорлик субъектларини давлат рўйхатидан ўтказиш тартиби тўғрисидаги низом қуйидаги мазмундаги 391-банд билан тўлдирилсин:
«391. Давлат рўйхатидан ўтган тадбиркорлик субъектлари тўғрисидаги маълумотлар аъзо сифатида рўйхатга қўйиш учун Савдо-саноат палатаси билан давлат рўйхатидан ўтказувчи орган ўртасидаги ўзаро интеграциялашган электрон тизим орқали Палата томонидан тўғридан-тўғри олинади.
Бунда, Палата томонидан тадбиркорлик субъектларини аъзо қилиш «Ўзбекистон Республикаси Савдо-саноат палатаси тўғрисида»ги Ўзбекистон Республикасининг Қонунида белгиланган тартибда амалга оширилади».
2. Вазирлар Маҳкамасининг «Ёшлар тадбиркорлик кластерларини ташкил этишга доир ташкилий чора-тадбирлар тўғрисида» 2017 йил 16 октябрдаги 834-сон қарорининг 6-банди учинчи хатбошисидаги «ҳузуридаги тадбиркорликка кўмаклашиш марказлари» сўзлари «туман (шаҳар) бўлимлари» сўзлари билан алмаштирилсин.
3. Вазирлар Маҳкамасининг «Ишлаб чиқариш майдонларидан фойдаланиш самарадорлигини янада ошириш чора-тадбирлари тўғрисида» 2019 йил 13 августдаги 666-сон қарорида:
а) 1-иловадаги «Туман (шаҳар) тадбиркорликка кўмаклашиш маркази директори» сўзлари «Савдо-саноат палатаси туман (шаҳар) бўлими бошлиғи» сўзлари билан;
б) 2-иловадаги «Туман (шаҳар) тадбиркорликка кўмаклашиш маркази директори» сўзлари «Савдо-саноат палатаси туман (шаҳар) бўлими бошлиғи» сўзлари билан алмаштирилсин.
4. Вазирлар Маҳкамасининг 2021 йил 29 декабрдаги 786-сон қарори билан тасдиқланган Ташқи беғараз кўмак маблағлари ҳисобига молиялаштириладиган лойиҳаларни тайёрлаш, амалга ошириш ва мониторинг қилиш тартиби тўғрисидаги низомнинг 26-банди қуйидаги мазмундаги иккинчи хатбоши билан тўлдирилсин:
«Давлат органлари ва идоралари томонидан тадбиркорликка оид барча беғараз кўмак лойиҳаларини амалга оширишда Савдо-саноат палатаси лойиҳа ҳамкори сифатида жалб қилинади».
5. Вазирлар Маҳкамасининг 2022 йил 13 июндаги 328-сон қарори билан тасдиқланган Маҳаллий нодавлат нотижорат ташкилотларининг халқаро грант лойиҳаларини амалга оширишда давлат бошқаруви органлари билан ўзаро ҳамкорлик қилиш тартиби тўғрисидаги низомнинг 1-банди «нодавлат нотижорат ташкилотларининг» сўзларидан кейин «(бундан Ўзбекистон Савдо-саноат палатаси мустасно)» сўзлари билан тўлдирилсин.
*Ушбу ҳужжат Қонун ҳужжатлари маълумотлари миллий базасида (lex.uz) эълон қилинган ва 30.05.2023 йилдан кучга кирди.