Ногиронлик пенсияси тўлови тўхтатиб қўйилмаслиги учун айрим қоидаларни ҳамда уларни тиклаш шартларини ёддан чиқармаслик керак.
Қайта тиббий кўрикдан ногиронлик муддати тугаган кундан бошлаб бир ой ичида ўтилиши лозим. Белгиланган муддатда қайта кўрикдан ўтиш учун борилмаган ҳолатларда пенсия тўлаш тўхтатиб турилади.
Уни яна ногирон деб тан олинган тақдирда тўхтатиб қўйилган кундан бошлаб пенсия тўлови тикланади. Бошқа ҳолатларда мурожаат қилинган кундан бошлаб пенсия тўланади.
Узрли сабабга кўра қайта кўрикдан ўтиш муддати ўтказиб юборилганда, агар ТМЭК уни ана шу даврда ногирон бўлган деб топса, пенсия тўлаш тўлов тўхтатиб қўйилган кундан бошлаб то қайта кўрикдан ўтиш кунигача, лекин кўпи билан ўтган 3 йил учун давом эттирилади.
Бунда ногирон қайта кўрикдан ўтказиш чоғида ногиронликнинг бошқа гуруҳига (юқори ёки паст гуруҳга) ўтказилган бўлса, пенсия кўрсатиб ўтилган вақт учун аввалги гуруҳ бўйича тўланади.
Умумий касаллик оқибатида меҳнат қобилиятини йўқотган ногиронга меҳнат қобилияти тикланганлиги сабабли пенсия тўлаш тўхтатилган ёки узрсиз сабабларга кўра қайта кўрикдан ўтишга келмаганлиги оқибатида тўхтатиб қўйилган бўлса, уни яна ногирон деб тан олинган тақдирда, агар пенсияни тўлаш тўхтатилганидан кейин 5 йилдан ортиқ вақт ўтмаган бўлса, илгари тайинланган пенсияни тўлаш ногиронлик белгиланган кундан бошлаб тикланади.
Агар 5 йилдан ортиқ вақт ўтган бўлса, пенсия яна умумий асосларда тайинланади.
Маълумот учун!
Боқувчисини йўқотганлик ПЕНСИЯси пенсионернинг (боқувчининг) пенсияси оширилган ИШ ҲАҚИДАН ҳисоблаб чиқарилади.