Компания-харидор компания-сотувчи билан товар етказиб бериш шартномасини тузган. Сотувчи етказиб беришни 30 кунга кечиктирган.
Харидор етказиб бериш кечикканига норозилик билдирмаса, бунинг учун пеня ундирилмаса бўладими?
– Шартномада қайд этилган шартлардан келиб чиққан ҳолда пеня ундирмаслик мумкин.
Хўжалик шартномаси учун бир қатор мажбурий шартлар мавжуд, улар кўрсатилганда шартнома лозим даражада тузилган ҳисобланади.
Шартнома шартларининг бажарилмаганлиги ёки лозим даражада бажарилмаганлиги учун томонларнинг жавобгарлиги шартноманинг муҳим шарти ҳисобланади («Хўжалик юритувчи субъектлар фаолиятининг шартномавий-ҳуқуқий базаси тўғрисида»ги Қонуннинг 10-моддаси, 1-қисми).
Шартноманинг лозим даражада бажарилмаганлиги учун жавобгарлик чоралари, агар шартномада бошқа ҳолатлар назарда тутилмаган бўлса, қўлланилади. Шу боис томонларнинг жавобгарлиги шартномада белгиланади, яъни томонларнинг келишувига кўра пеня ҳисобланмайди. Шунингдек жавобгарлик қонун ҳужжатлари нормаларига ҳавола кўринишида қайд этилиши мумкин. (Қонуннинг 24, 25-моддалари). Амалиётда шартномада «пеня ундирилиши томонларнинг мажбурияти эмас, балки ҳуқуқи ҳисобланади» деб талқин қилиниши мумкин.
