ЭҲФда чакана товар айланмаси қандай акс эттирилади? Бир томонлама ЭҲФни ёзиб бериш мумкинми?
– Ҳа, корхона бир томонлама тартибда харидорни номма-ном санаб ўтилмаган ҳолда электрон ҳисобварақ-фактурани ёзиб бериши мумкин. Битта сатрда «Чакана сотилган товарлар» деб кўрсатилиши ва умумий сумма акс эттирилиши лозим. ЎзР ДСҚнинг расмий сайтида шундай тушунтириш берилган.
Аҳолига назорат-касса аппаратлари (тўлов терминаллари) орқали реализация қилинган товарлар (хизматлар) айланмасининг умумий суммаси солик даври (ой) якунлари бўйича бир сатрда акс эттирилади ҳамда «ЭҲФ бир томонлама тартибда» бандини танлаш орқали ЭҲФ шакллантирилади, бу ерда контрагентнинг маълумотлари киритилмайди. Товарларни (ишлар, хизматларни) тадбиркорлик фаолияти билан шуғулланмайдиган жисмоний шахсларга реализация қилишда товарларни (ишлар, хизматларни) сотувчи томонидан шакллантирилган ЭҲФ унинг электрон рақамли имзоси билан бир томонлама тасдиқланади (Низомнинг 18-банди, ВМнинг 25.06.2019 йилдаги 522-сон қарорига 1-илова).
