Корхона асбоб-ускуналарнинг битта комплектини текинга олиб кирди. Асбоб-ускуналарнинг бошқа комплекти учун ҳали ҳисоб-китоб қилинмади.
1. Корхона Низомда (АВ томонидан 25.08.2017 йилда 2918-сон билан рўйхатдан ўтказилган) кўрсатилган, текинга олинган импорт асбоб-ускуналар бўйича ЯСТга доир имтиёзни қўллашга ҳақлими?
2. Импорт асбоб-ускуналар учун ҳисоб-китоб қилинмаган бўлса, ЯСТ бўйича имтиёз қўлланадими?
О.Пак, директор.
|
1 |
Йўқ, текинга олинган асбоб-ускуналар бўйича ЯСТга доир имтиёз қўлланмайди.
Имтиёз маблағларни инвестицияларга, шу жумладан янги технологик асбоб-ускуналар олишга йўналтирувчи корхоналар учун назарда тутилган. Маблағларни инвестицияларга йўналтириш деганда корхона асбоб-ускуналарни олиш учун молиявий ёки бошқа моддий воситаларни сарфлагани тушунилади (АВ томонидан 25.08.2017 йилда 2918-сон билан рўйхатдан ўтказилган Низомнинг 1-банди).
Корхона текинга олинган импорт асбоб-ускуналарга моддий, молиявий ва бошқа воситаларни сарфламаган – яъни инвестициялар қилмаган. Шу сабабли янги технологик асбоб-ускуналар олишга маблағлар йўналтирилганда тақдим этиладиган ЯСТ бўйича имтиёзни у текинга олинган ҳолатда қўллаб бўлмайди.
|
2 |
ЯСТ бўйича солиқ солинадиган база янги технологик асбоб-ускуналар олишга йўналтирилган маблағлар суммасига камайтирилади (Низомнинг 12-банди).
Шу тариқа, корхона асбоб-ускуналар олишга маблағларни йўналтирмаган бўлса, тегишинча, ЯСТни камайтириш учун сумма бўлмайди. Импорт қилинган янги технологик асбоб-ускуналар учун етказиб берувчи билан ҳисоб-китоб қилинмаганлиги сабабли ЯСТ бўйича имтиёз қўлланмайди.
Дарина АБУХОВИЧ, «Norma Online» эксперти.
