Ходим боласи 2 ёшга тўлгунга қадар уни парваришлаш таътилида бўлган пайтда иккинчи болага ҳомиладорлик ва туғиш бўйича касаллик варақасини тақдим этди.
Ходимнинг болани парваришлаш таътилида бўлиши меҳнат фаолиятидаги танаффус ҳисобланадими?
Н.Каширина.
– Йўқ, ҳисобланмайди, сабаби болани парваришлаш таътиллари даврида аёлнинг иш жойи (лавозими) сақланади.
Бу таътиллар меҳнат стажига, лекин ҳаммасини жамлаганда кўпи билан 3 йил, шу жумладан мутахассислиги бўйича иш стажига ҳам қўшилади (МКнинг 234-моддаси 5-қисми).
Масалан, агар меҳнат дафтарчасидаги ёзувларга кўра умумий меҳнат стажи, шу жумладан 2 нафар фарзандни парваришлаш таътилида бўлган 5 йилни ҳисобга олган ҳолда 38 йилни ташкил этган бўлса, пенсияни ҳисоблаб чиқариш учун умумий стаж 36 йилни (38 – 5 + 3) ташкил этади. Яъни бу ҳолда Пенсия жамғармаси бўлими 2 йилни чиқариб ташлайди.
Абдусалом Рисқуллаев, «Norma Online» етакчи эксперти.