«Сейсмик хавфсизликни таъминлаш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиришлар киритиш тўғрисида»ги (25.03.2025 йилдаги ЎРҚ-1050-сон) Қонун билан айрим қонун ҳужжатларига ўзгартиришлар киритилди. Улар бинолар ва иншоотларни қуришни ва таъмирлашни амалга оширувчи ташкилотларнинг масъулиятини ошириш, шаҳарсозлик тўғрисидаги қонунчиликда белгилаган талабларга қатъий риоя этилиши устидан назоратни кучайтиришга қаратилган.
Ўзбекистон Республикаси Жиноят кодексига қуйидаги ҳолларда жавобгарликни белгиловчи ўзгартиришлар киритилмоқда:
• бинолар ва иншоотлардан фойдаланишга доир рухсатнома бериш ҳамда уларни фойдаланишга қабул қилиб олиш қоидаларини бузганлик учун;
• шаҳарсозлик соҳасидаги ваколатли давлат органларининг рухсатисиз объектларни қурганлик учун;
• қонунчиликни бузган ҳолда кўп квартирали уйларда таянч конструкцияларни ўзгартирганлик ва (ёки) реконструкция қилганлик учун;
• бинолар ва иншоотларни аҳоли пунктларининг тасдиқланган бош режалари, уларни режалаштириш ва қуриш лойиҳаларини бузган ҳолда лойиҳалаштирганлик, реконструкция қилганлик ва қурганлик учун.
Бунда жиноий жавобгарлик айбдор шахслар ушбу ҳуқуқбузарликлар учун маъмурий жавобгарликка тортиб бўлинганидан кейин юзага келади. Одам ўлишига ёки бошқа оғир оқибатларга сабаб бўлган тарзда шаҳарсозлик тўғрисидаги қонунчиликни бузганлик учун алоҳида жиноий жавобгарлик белгиланмоқда.
Шунингдек қонунчиликни бузган ҳолда, кўп квартирали уйлардаги таянч конструкцияларни ўзгартириш ва (ёки) реконструкция қилиш билан боғлиқ жиноятни биринчи марта содир этган ҳамда амалга оширилган ўзгартириш ёки бузилишларни, шунингдек уларнинг оқибатларини ихтиёрий равишда бартараф этган шахс жавобгарликдан озод этилиши мумкинлиги назарда тутилмоқда.
Ўзбекистон Республикасининг Маъмурий жавобгарлик тўғрисидаги кодекси лойиҳа ташкилотларининг муаллиф назоратини амалга ошириш доирасида бераладиган кўрсатмаларини буюртмачилар томонидан бажармаганлик, шунингдек объектларни эксперт ташкилотларнинг шаҳарсозлик ҳужжатларига доир ижобий хулосасисиз қурганлик учун жавобгарликни белгиловчи нормалар билан тўлдирилмоқда. Шунингдек шаҳарсозлик соҳасидаги қоидабузарликлар учун солинадиган жарималар миқдорларини кўпайтириш назарда тутилмоқда.
Бундан ташқари, Ўзбекистон Республикаси Қурилиш ва уй-жой коммунал хўжалиги вазирлиги ҳамда мазкур Вазирлик ҳузуридаги Қурилиш ва уй-жой коммунал хўжалиги соҳасида назорат қилиш инспекцияси органлари томонидан кўриб чиқиладиган маъмурий ишларнинг тааллуқлилиги аниқлаштирилмоқда.
«Лицензиялаш, рухсат бериш ва хабардор қилиш тартиб-таомиллари тўғрисида»ги (14.07.2021 йилдаги ЎРҚ-701-сон) Қонунга қурилиши (реконструкция қилиниши) тугалланган объектлардан фойдаланишга доир рухсат бериш хусусиятига эга ҳужжатнинг номи ўзгартирилишини назарда тутувчи ўзгартириш киритилмоқда.
Қонун қурилишлар сифатини оширишга, бинолар ва иншоотлар қонунга хилоф равишда қурилишининг олдини олишга ҳамда шаҳарсозлик тўғрисидаги қонунчилик талабларига қатъий риоя этилишини таъминлашга хизмат қилади. Ушбу Қонун расмий эълон қилинган кундан эътиборан 3 ой ўтгач кучга киради.