Истеъмолчи сотиб олинган товар сифатига дахлдор низоли вазиятлар юзага келганда қаерга мурожаат қилиши лозим?
– Амалдаги қонун ҳужжатларига мувофиқ истеъмолчи унга сотилган товар лозим даражадаги сифатга эга эмас деб ҳисоблаган ҳолатларда, у товар ёки касса чекини тақдим этган ҳолда бевосита сотувчига мурожаат қилишга ҳақли. Сотувчи истеъмолчининг қуйидаги талабларини қаноатлантириши шарт:
- айнан шундай маркадаги (модел, артикулдаги) товарга алмаштириш;
- харид нархини тегишли равишда қайта ҳисоб-китоб қилган ҳолда бошқа марка (модел, артикул)даги айнан шундай товарга алмаштириш;
- харид нархи мутаносиб равишда камайтирилиши;
- товарнинг нуқсонлари дарҳол бепул бартараф этилиши;
- товарнинг нуқсонларини бартараф этиш харажатлари қопланиши.
Бунда харидор зарур сифатга эга бўлмаган товар сотилганлиги оқибатида ўзига етказилган зарар тўлиқ қопланишини талаб қилишга ҳақлидир (Қоидаларнинг 29-б., ВМнинг 13.02.2003 йилдаги 75-сон қарорига 1-илова). Мазкур талаб суд тартибида қаноатлантирилади. Бироқ истеъмолчи ва сотувчи ўртасида ўзаро келишувга эришилган ҳолатда етказилган зарар суддан ташқари тартибда қопланиши мумкин.
Лола Абдуазимова.
