2021–2030 йилларда Аҳолининг ижтимоий ҳимоя қилинишининг миллий стратегия концепцияси лойиҳаси Молия вазирлиги томонидан ишлаб чиқилган ва муҳокама учун эълон қилинган.
Лойиҳа етакчи халқаро ташкилотлар: ХМТ, БМТТД, ЮНИСЕФ, Жаҳон банки, ОТБ ва ЕИ билан ҳамкорликда ишлаб чиқилган.
Стратегияни амалга ошириш учун Кенгаш ташкил этилади, қуйидагилар унинг асосий вазифалари жумласига киради:
● давлат томонидан кўрсатиладиган ижтимоий ёрдам ва хизматлар тизимини баҳолаш ва мониторинг қилиш учун инструментларни аниқлаш бўйича чора-тадбирларни ишлаб чиқиш, статистик маълумотларнинг сифатини яхшилаш ва очиқлигини таъминлаш;
● ижтимоий нафақаларнинг миқдорларини белгилашдаги мезонларни қайта кўриб чиқиш, халқаро стандартларга асосланган ва миллий менталитет, аҳоли турмуш тарзидан келиб чиққан ҳолда, ижтимоий ҳимоя минимал даражасини аниқлаш;
● кам таъминланган оилаларга моддий ёрдам ва болалари бўлган оилаларга нафақаларнинг структураси сифатини ошириш, даромади паст аҳоли қатламини аниқлаш мезонларини кўриб чиқиб очиқ ва адолатли тизимни яратиш;
● ижтимоий хизматлар кўрсатиш механизмларини интеграция қилиш учун «Ижтимоий ҳимоя ягона реестри» ахборот тизими функцияларини янада кенгайтириш;
● камбағалликни қисқартириш ва инсон капиталини ривожлантириш дастурларини, шунингдек аҳоли бандлигига кўмаклашиш ва меҳнат бозорини активлаш бўйича дастурларни ўзаро мувофиқлаштириш;
● болалар, ёлғиз кексалар, пенсионерлар ва ногиронларга ижтимоий ёрдамни етказиш тартиби ва тизимини қайта кўриб чиқиш ва мукаммаллаштириш.
Ҳужжат лойиҳаси билан:
● 2021–2030 йилларда Аҳолининг ижтимоий ҳимоя қилинишининг миллий стратегия концепцияси;
● Концепцияни амалга ошириш бўйича «Йўл харитаси»ни тасдиқлаш назарда тутилган.
Лойиҳалар ўзгартирилиши, уларга қўшимчалар киритилиши ёки рад этилиши мумкин.
Лола АБДУАЗИМОВА.
