Ушбу қарор инфляциянинг янада секинлашиб йил якунида прогноз кўрсаткичларига эришиш бўйича ишончнинг мустаҳкамланиши, иқтисодиётда ижобий реал фоиз ставкаларини сақлаб қолиш зарурати, шунингдек, пандемия шароитида инфляцияни пасайтириш ва иқтисодий фаолликни қўллаб-қувватлаш мақсадлари ўртасидаги мувозанатни таъминлаш билан изоҳланади.
Бунда, прогноз қилинаётган даврда инфляцияни кескин оширувчи омилларнинг нисбатан камлиги пул-кредит шароитларини инфляцион хатарларни юзага келтирмасдан юмшатиш имконини беради.
Марказий банк йил якуни бўйича инфляциянинг прогноз коридорининг қуйи чегарасига яқин даражада шаклланиш эҳтимоли билан инфляция прогнозини 11-12,5% даражасида ўзгаришсиз сақлаб қолади. Инфляцион кутилмалар барқарор пасайиши ва макроиқтисодий барқарорликнинг сақлаб қолиниши шароитида инфляция прогнози янада пасайтириш томонга кўриб чиқилиши мумкин.
Марказий банк Ҳукумат билан биргаликда 2023 йилга қадар инфляциянинг 5%лик доимий мақсадли кўрсаткичига эришиш учун барча зарурий чораларни кўриб боради.
cbu.uz.
