Яқинда «NORMA» профессионал камолот маркази Ўзбекистонда фаолият олиб бораётган хорижий корхоналар ва ташкилотлар ваколатхоналари учун тренинг ўтказди. Тадбир «BAKER TILLY UZBEKISTAN» компанияси аудиторлик-консалтинг гуруҳининг етакчи мутахассислари:
бошқарувчи ҳамкор, амалдаги аудитор ва солиқ тўғрисидаги қонун ҳужжатлари ҳамда бизнес ҳуқуқи масалалари бўйича маслаҳатчи Олег Даминов;
юридик амалиёт раҳбари, адвокат, йирик корхоналарнинг ҳуқуқий консалтинги бўйича мутахассис Андрей Лубенец;
«BAKER TILLY UZBEKISTAN» компанияси солиқ амалиёти раҳбари Ирина Агафонова томонидан бошқариб борилди.
«NORMA» ўтказадиган тренингларнинг ўзига хос хусусияти иштирокчилар томонидан берилган масалаларнинг амалиётчи мутахассислар билан биргаликда интерфаол режимда муҳокама этилишида яққол кўзга ташланади.
Бу галги тренингда гап чет эл корхоналарининг Ўзбекистондаги ваколатхоналарини аккредитациядан ўтказиш ва бундай ваколатхоналарни ёпишнинг, уларни ҳисобга қўйиш ва уларга солиқ солишнинг ўзига хос хусусиятлари ҳақида борди. Бундан ташқари иштирокчилар делегация аъзолари учун мўлжалланган эсдалик буюм ва совғалардан даромад солиғи олиниш-олинмаслиги масаласини, идоранинг ички харажатларини, шу жумладан ҳақини корпоратив карточка ёрдамида тўлаш орқали харид қилинган товарларни, ваколатхона ходимларига хизмат сафари харажатлари тўловини қай йўсинда тўғри расмийлаштириш ҳамда чек ёки бошқа тасдиқловчи ҳужжатлар тақдим этилмаган харажатларни ваколатхона ходимлари қай тартибда компенсация қилиши лозимлигини ҳам билиб олдилар. Улар ўз фаолиятининг барча босқичларидаги, хусусан контрагентлар билан шартнома тузишдаги, автомобиллардан фойдаланишдаги, мол-мулкни реализация қилишдаги ҳуқуқий таваккалчилик ва бошқа хил масалалар муфассал ёритиб берилди.
«BAKER TILLY UZBEKISTAN» мутахассислари Ўзбекистон норезидентларининг доимий муассасаларини ҳисобга қўйиш ва рўйхатдан ўтказиш юзасидан, улар томонидан бухгалтерия ва солиқ ҳисобини юритишнинг ўзига хос хусусиятлари ҳақида, ташкил топиш ва фаолият юритишнинг ҳуқуқий ҳамда ташкилий асослари бўйича тушунтиришлар бердилар.
Тренинг «Norma» ахборот-қидирув маҳсулларини қўлланиш асосида ўтди. Унинг ёрдамида экспертлар ҳавола йўсинида зикр этган норматив ҳужжатлар намойиш қилиб кўрсатилди.
Иштирокчилар йигирма кишидан ошмаганлиги туфайли мутахассислар улардан ҳар бирига имкон қадар кўпроқ эътибор қаратдилар.
– Таъкидлашим жоизки, тренинг анчагина қизиқарли ва мазмундор ўтди, – дейди Ўзбекистон Солиқ маслаҳатчилари палатаси бошқаруви раиси Ботир Мансуров. – Иштирокчиларда саволлар йиғилиб қолган экан, экспертлар уларнинг ҳаммасига жавоб беришди. Энг баҳсли масалалар юзасидан ҳатто мунозаралар ҳам бўлди. Мен ташкилотчиларга эксперт сўз юритаётган у ёки бу ҳужжат билан танишиш учун иштирокчиларга «Norma» АҚТдан фойдаланиш имконияти беришни таклиф қилган бўлур эдим.
– «NORMA» ва «BAKER TILLY UZBEKISTAN» компаниялари томонидан ташкил этилган махсус тренинг юксак профессионал даражада ўтди, – деди «CORBET TRANS TASHKENT» МЧЖ ХК бош бухгалтери Наргиза Болтахўжаева. – Уни ваколатхоналар иши билан боғлиқ турли масалаларни ҳал этишда бой тажрибага эга, юқори малакали мутахассислар ўтказгани менга ёқди. Тренинг мобайнида улар реал воқеаларни гапириб бердилар. Бу ерда ваколатхона ходимларини Ўзбекистон Ташқи ишлар вазирлигининг Дипломатик сервис хизматида рўйхатдан ўтказиш керакми деган саволимга жавобан уларни рўйхатдан ўтказиш мажбурий эмас, балки ҳуқуқ қўлланиши тартибидаги иш эканлигини айтишди. Биргина истагим, тренинг муддати бир мунча узайтирилса ёмон бўлмасди.
– Иштирокчилар тренинг бошлангунига қадар ўзларини қизиқтираётган саволларини юборишлари мумкинлиги зўр иш бўлибди, негаки бу нарса ташкилотчиларга саволларга тўлиқ жавоб тайёрлаш имконини беради, – дейди «Азия Альянс Банк» ОАТБ юридик бўлимининг етакчи мутахассиси Лола Сабурова. – Шунингдек муҳокама асносида экспертлардан ўзингни қизиқтираётган масалалар юзасидан савол сўрашинг мумкин. Шу сабабли ҳам иштирокчилар юқори малакали экспертлардан имкон қадар кўпроқ тавсиялар олишга ҳаракат қилишди. Олдиндан юборилган саволларга афзаллик берилса ёмон бўлмасди. Умуман олганда, тренинг менда яхши таассурот қолдирди. Ўйлантириб юрган саволларимга жавоб олдим, бундан ташқари асосан бухгалтерия йўналишидаги кўпгина янгиликларни билиб олдим. Тренингда айтиб ўтилган баъзи нарсалардан мутлақо бехабар эканман. Шунинг учун бўлса керак, мен учун янгилик, кашфиёт даражасидаги ахборотлар кўп бўлди. Қолаверса ташкилотчиларнинг иштирокчилар фикри билан қизиқиб, келгуси тренинг ва семинарлар мавзуси юзасидан таклифлар бериш имкониятини яратганликлари менга жуда ёқди. Бу имкониятдан албатта фойдаланаман.
Ольга КИРЬЯКОВА,
мухбиримиз.
