Ягона солиқ тўлови тўловчиси ҳисобланган корхонамизда 2013 йилнинг I чораги учун ҳисоботлар тўлдирилаётганда муаммога дуч келинди.
Ягона ижтимоий тўлов, фуқароларнинг суғурта бадаллари ва бюджетдан ташқари Пенсия жамғармасига мажбурий ажратмалар бўйича ҳисоботнинг 020-«Ягона ижтимоий тўлов ҳисобланмайдиган тўлов турлари» сатрида ҳомиладорлик ва туғиш бўйича касаллик варақасининг тўланган суммасини ва ходимларга тўланган моддий ёрдам суммаларини акс эттириш тўғрими ёки нотўғрими, шуни тушунтириб беришингизни илтимос қиламиз.
Сайдулло Баҳриддинов, МЧЖ бош бухгалтери.
Тошкент вилояти.
– СКнинг 306-моддасига кўра, СКнинг 172-моддасида кўрсатилган иш ҳақи тарзидаги даромадлар ягона ижтимоий тўловнинг ва суғурта бадалларининг солиқ солиш объекти ҳисобланади. Хусусан, ягона ижтимоий тўлов ва суғурта бадаллари солинадиган даромадларни аниқлашда СКнинг 306-307-моддаларига амал қилиш керак. Уларда солиқ солиш объекти бўлиб фақат меҳнатга ҳақ тўлаш тарзидаги даромадларгина ҳисобланади, бундан СК 308-моддасида кўрсатилганлари мустасно деб белгиланган. Бундай солиқ солинадиган даромадларга қуйидагилар киради:
иш ҳақи ва бажарилган иш учун бошқа тўловлар (СКнинг 172-моддаси);
рағбатлантириш хусусиятига эга тўловлар (СКнинг 173-моддаси);
компенсация тўловлари (СКнинг 174-моддаси);
ишланмаган вақт учун ҳақ (СКнинг 175-моддаси).
Ягона ижтимоий тўлов ва бюджетдан ташқари Пенсия жамғармасига фуқаролар суғурта бадалларининг ҳисоб-китобларидаги 020-«Ягона ижтимоий тўлов (фуқароларнинг бюджетдан ташқари Пенсия жамғармасига суғурта бадаллари) ҳисобланмайдиган тўлов турлари» сатрида СКнинг 308-моддасига ва бошқа меъёрий-ҳуқуқий ҳужжатларга мувофиқ тўловларнинг имтиёзли турларига кирадиган иш ҳақи тарзидаги даромадлар акс эттирилади.
Жумладан, ҳомиладорлик ва туғиш бўйича касаллик варақасининг тўланган суммаси ҳамда ходимларга тўланган моддий ёрдам суммалари иш ҳақи тарзидаги даромадларга кирмайди, балки СК 178-моддасининг 1 ва 16-бандларига кўра бошқа даромадларга киради, улар ягона ижтимоий тўлов ва фуқароларнинг суғурта бадаллари бўйича солиқ солинадиган базага киритилмайди.
Шу тариқа, ҳомиладорлик ва туғиш бўйича касаллик варақасининг тўланган суммаси ҳамда ходимларга тўланган моддий ёрдам суммалари ЯИТ ва бюджетдан ташқари Пенсия жамғармасига фуқароларнинг суғурта бадалларининг ҳисоб-китоблари 020-сатрида акс эттирилмайди.
Жавобларни экспертимиз Ғуломжон ТЎлаганов тайёрлади.
