Вазирлар Маҳкамасининг 12.07.2025 йилдаги 431-сон қарори билан Лифтларни техник кўрикдан ўтказиш тартиби тўғрисидаги низом тасдиқланди. Ҳужжатга кўра бино ва иншоотларда ўрнатилган ва доимий фойдаланишда бўлган лифтлар 12 ойда камида бир марта мажбурий даврий техник кўрикдан ўтказилиши керак.
Ҳар қандай фойдаланишга топширилган ёки янгидан ўрнатилган лифт махсус электрон ахборот тизимида рўйхатга олишдан олдин мажбурий равишда дастлабки техник кўрикдан ўтказилиши керак. У лифт пудратчисининг мурожаати бўйича ихтисослашган ташкилот томонидан 10 иш кунидан кечиктирилмай ўтказилади.
Техник кўрик натижалари бўйича лифтга қуйидаги рангдаги ахборот белгиси қўйилади:
• яшил – фойдаланишга яроқли лифт учун;
• кўк – қисман носозлиги бўлган лифт учун;
• сариқ – носоз лифт учун;
• қизил – фойдаланиш учун хавфли лифт учун.
Фойдаланиш учун хавфли деб тан олинган ва қизил белги билан белгиланган лифт фойдаланишга рухсат берилмайди, деб хабар беради https://t.me/pravoinf канали.