УМШларни қандай «бўғишди»
Ўтган йил, менимча, кўп квартирали уй-жой фондини бошқаришда энг оғир давр бўлди. Бошқарув органи сифатида УМШнинг йўқ қилиниши на боши ва на охири бўлган ислоҳотларнинг якунланиш қисми бўлганга ўхшайди. Улар ўрнига «ислоҳотчилар» уй аҳлини «профессионаллаштириш» тариқасида мажбурий тартибда бошқарувчи компанияларга ўтказдилар. Бунда бошқа вариантлар қўлланилмади. Уй-жой хизматлари бозорида фақат БКлар фаолият юритиши учун шундай қилинди. Уй-жой кодексининг ҳамда «Кўп квартирали уйларни бошқариш тўғрисида»ги Қонуннинг нормаларига зид ҳолатлар содир этилди. Уларда қуйидаги учта бошқарув усулидан бирини танлаш эркинлиги назарда тутилган: ёки бошқарув компанияси (бошқарувчи), ёхуд УМШ, ёки бевосита мулкдорлар жамоаси томонидан бошқариш. Агар ушбу тамойил бузиладиган бўлса, демак, «ислоҳотчилар»нинг ҳаракатлари ҳуқуқларга зид бўлади ва улар қандай усулда тақдим этилишидан қатъи назар, ҳуқуқбузарлик ҳисобланади.