Гилам тўқувчи экспортчилар – эътиборда

Мамлакатимизда миллий ҳунармандчилик, халқ амалий санъатини, шу жумладан ипак ва жундан қўлда гилам тўқиш соҳасини ривожлантириш ва ноёб санъат асари ҳисобланадиган ушбу гиламларни бозор талабларига уйғунлаштириш мақсадида Президентимизнинг «Республикада қўлда тўқилган гиламчилик соҳасини ривожлантириш чора-тадбирлари тўғрисида»ги қарори (26.06.2020 йилдаги ПҚ-4759-сон) қабул қилинди. Ҳужжатда қўлда тўқилган гиламларни экспорт қилишда автомобиль, темир йўл ва ҳаво транспортида ташиш харажатларини 50 фоизигача миқдорда компенсация қилишга субсидиялар тақдим этилиши белгиланган. 

Ушбу механизм, хусусан, қуйидагиларни экспорт қилишда тақдим этилади:

1) тугунли гиламлар ва бошқа полга тўшаладиган тўқима қопламалар, тайёр ва  тайёр бўлмаганлари:

• Ÿ таркибида 10% дан ортиқ шойи иплар ёки ипак чиқитларидан йигирилган иплар бўлган, тарандилардан ташқари (ТИФ ТН коди 5701 10 100 0);
• Ÿ ипак иплардан, ипак чиқитларидан йигирилган иплардан, тарандилардан ташқари, сунъий иплардан, 5605-товар позициядаги иплардан ёки таркибида металл иплар бўлган тўқимачилик материалларидан (5701 90 100 0);

2) бошқа тўқилган гиламлар ва бошқа тўқима тўшамалар, тафтингли ёки флокирланмаган, тайёр ва тайёр эмаслари), шу жумладан  «килим», «сумах», «кермани» ва бошқа шунга ўхшаш жундан ёки ҳайвонларнинг ингичка қилидан қўлда тўқилган гиламлар (5702 41 900 0);

3) жундан ёки ҳайвонларнинг ингичка қилидан тайёрланган гиламлар ва бошқа тўқима тафтинг тўшамалар, тайёр ва тайёр эмаслари) (5703 10 000 0).

Инвестициялар ва ташқи савдо вазирлигига 2021 йил 1 январга қадар «Ўзбекипаксаноат» уюшмаси таклифига асосан жун, калаваланган жун ҳамда қўлда тўқилган гиламларни олиб киришда импорт божлари мавжуд хорижий давлатлар билан мазкур импорт божларини бекор қилиш масаласини ушбу давлатлар билан ўтказиладиган ҳукуматлараро комиссия мажлисларининг кун тартибига киритиш вазифаси топширилди.

«Ўзбекипаксаноат» уюшмаси бир ой муддатда ўтказилган таҳлиллар асосида Иқтисодий тараққиёт ва камбағалликни қисқартириш вазирлиги, Молия вазирлиги, Инвестициялар ва ташқи савдо вазирлиги ҳамда Давлат божхона қўмитасига белгиланган тартибда ҚҚС ва божхона божига тортилмайдиган, ўхшаши ЎзРда ишлаб чиқарилмайдиган импорт қилинадиган технологик асбоб-ускуналар рўйхатига ўзгартириш киритиш бўйича таклиф киритиши лозим.

*Гилам ва гиламчалар, палослар, хуржунлар, кигиз буюмлар, шолчалар, жойнамозлар, ўтовлар, табиий толадан тайёрланган буюмлар.