Тошкент шаҳар божхона бошқармасида «Тошкент-Аэро» ИБК билан ҳамкорликда ташқи иқтисодий фаолият қатнашчилари учун учрашув ташкил этилди.
Унда республика Президенти Девони, Тошкент шаҳар ҳокимлиги, адлия бошқармаси, ТИАИ вазирлиги ҳамда Савдо-саноат палатаси, Марказий банк ва бошқа тижорат банклари, Дарё ва транспорт агентлиги, минтақавий темир йўл узелининг пойтахт бошқармалари, Тошкент шаҳар ДСБ, Божхона брокерлари уюшмаси, шунингдек бир қатор сертификатлаштириш органларининг масъул ходимлари иштирок этди.
Учрашувда бошқа масалалар қатори Ўзбекистон Республикасининг «Коррупцияга қарши курашиш тўғрисида»ги Қонуни ижроси юзасидан божхона органлари тизимида коррупцияга нисбатан муросасиз муносабатни шакллантириш мақсадида амалга оширилиши лозим бўлган ишлар тўғрисида ҳам тўхталиб ўтилди. Мазкур Қонун коррупцияга қарши курашиш соҳасидаги ҳуқуқий муносабатларни тўлиқ қонуний тартибга солиб, давлат органлари, ташкилотлар ҳамда фуқаролик жамияти институтлари томонидан амалга оширилаётган коррупцияга қарши қаратилган чора-тадбирлар самарадорлигини оширишга, шунингдек коррупцияни ижтимоий ҳаётнинг барча соҳаларидан тўлиқ бартараф этишга хизмат қилади.
Тадбир давомида Тошкент шаҳар божхона бошқармаси ҳамда «Тошкент-Аэро» ИБКда 120-76-76, 120-86-30 рақамли ишонч телефонлари узлуксиз тартибда ишлаб турганлиги эслатилди. Ушбу телефон хизмати ёрдамида божхона тўғрисидаги қонун ҳужжатлари бузилишининг олдини зудлик билан олиш, мансабдор шахслар ва божхона ходимлари томонидан коррупция ва бошқа ҳуқуқбузарликларга йўл қўйилишига монелик қилиш имконияти яратилмоқда.
Тошкент шаҳар
божхона бошқармаси Ахборот хизмати.
