Республикамиз ҳудудидан ноёб ва маданий бойликларнинг олиб ўтилиши Маданий бойликларнинг олиб чиқилиши ва олиб кирилиши тартиби тўғрисида низом (ВМнинг 23.03.1999 йилдаги 131-сон қарори билан тасдиқланган) билан тартибга солиниб, унга мувофиқ хорижий фуқаролар ва бошқа шахслар томонидан Ўзбекистон Республикасига вақтинча олиб кириладиган маданий бойликлар тегишли божхона ҳужжатларида (хусусан йўловчи божхона декларациясида) кўрсатилиши керак.
Тожикистондан республикамизга кириб келар экан, хорижий фуқаролардан бирининг мазкур тартибларга риоя қилмаганлиги қимматга тушди. “Сариосиё” чегара божхона комплекси орқали автотранспорт воситасида кириб келган “меҳмон” йўловчи божхона декларациясини тўлдирар экан, ёнидаги барча буюмларни декларацияда қайд этганини маълум қилади. Шунингдек, божхоначиларнинг оғзаки сўрови пайтида ҳам ёнида ортиқча буюмлари йўқлигини қайта-қайта таъкидлайди. Шундан сўнг унга тегишли автотранспорт воситаси ўрнатилган тартибда ва холислар иштирокида кўздан кечирилганда, машина салонига 20 дона қадимий тангалар яширилганлиги маълум бўлди.
Яширин тарзда олиб ўтишга уриниш чоғида фош қилинган ушбу тангалар Сурхондарё вилояти бадиий экспертиза мутахассисларининг хулосасига кўра миллоддан аввалги IV–III, милодий I–III ҳамда XIII–XIV асрларга оид бўлиб, уларнинг ҳозирги вақтдаги қиймати 12,2 млн сўмга баҳоланган.
Давлат эгалигига ўтказилган мазкур тангалар Сурхондарё вилояти археология музейи фондидан жой олди.
Сурхондарё вилояти божхона бошқармаси
Ахборот хизмати.
