Уйимиз деразаси остига 3 та бетон скамейкани ўрнатишди. Бу иш, албатта, яхши. Бироқ уй аҳлининг кундузи ҳам, кечаси ҳам қулоқлари тинмайдиган бўлиб қолди. Бу ерга ёшлар йиғилишади, ярим тунгача мунозаралар, қичқириқлар, қуюшқондан чиқадиган сўкинишлардан қулоқлар батанг бўлади. Биз ана шу скамейкаларни ўрнатган туман ҳокимлиги ва маҳалла қўмитасига уларни олиб ташлаш илтимоси билан мурожаат қилдик. Улар эса бу иш билан ХУМШ шуғулланади деб жавоб беришди, ширкат эса уларни бошқа жойга кўчириш хусусида ўйламаяпти ҳам. Бундай вазиятда нима қилишимиз керак? Скамейкаларни ўрнатиш жойини аҳоли билан келишиб олиш керакми?
О.Турова.
– Яхши ниятни кўзлаб қилинган иш уй аҳлига зиён келтирган кўринади. Сиз кўп квартирали уйда яшайсиз. Скамейкаларни ўрнатиш чоғида қўшнилардан кимдир уйда бўлганлиги ва ободончилик ишларидан хабар топганлиги шубҳасиз. Ўша пайтда аҳолига ноқулайлик келтирмаслик учун уларни қаерга ўрнатишни келишиб олиш мумкин эди. Одатда бундай ҳолларда уйда яшовчилар ўртасида якдиллик бўлмайди. Баъзилар қарорни ёқлайдилар, бошқалар бунга қарши чиқадилар, қолганлар эса ҳаммасига бефарқ. Шу сабабли аввало битта фикрга келиш лозим: скамейкаларни жойида қолдириш керакми ёки кўчиришми?
Бетон скамейкалар уйга туташ ҳудудда ўрнатилган, уни ХУМШ аъзолари сақлашлари шарт. Уларни кўчириш режалаштирилмаган харажатлар, ширкат бюджетидан бошқа ишлар учун мўлжалланган маблағларни жалб этиш билан боғлиқ. Шу боис ширкат аҳолининг уларни бошқа жойга ўрнатиш илтимосига рад жавоби бериши мумкин.
Бироқ ХУМШда барча масалаларни умумий йиғилиш ҳал қилади. Агар аҳоли кўпчилик овоз билан масалани ижобий ҳал қилса, бошқарув уларнинг хоҳишига бўйсуниши керак. Агар у бундай қилишдан бош тортса, уйдаги яшовчиларнинг ҳаммаси имзо чеккан хат билан маҳалла қўмитасига мурожаат қилинг. Ҳеч бўлмаганда қўшнилар билаш келишишингиз ва скамейкаларни ўз ҳисобингиздан бошқа жойга кўчиришингиз мумкин.
Агар аҳолининг кўпчилиги бундай қилишга қарши бўлса, уларнинг қарорига қўшилишдан бошқа илож қолмайди, – бу қарор ХУМШнинг барча аъзолари учун мажбурийдир.
Мавзувий сонни Ирина ГРЕБЕНЮК олиб боради.
