2026 йил 1 июндан бошлаб қурилиш объектларида (якка тартибдаги уй-жой қурилиши бундан мустасно) экологик талаблар кучайтирилди. Бу Президентнинг «Тоза ҳаво» умуммиллий лойиҳасини амалга ошириш чора-тадбирлари тўғрисида»ги Фармонида (25.03.2026 й. ПФ-46-сон) назарда тутилган. Ҳужжат 2026–2030 йилларда атмосфера ҳавосини сифатини яхшилашга қаратилган мақсадларни белгилайди.
Хусусан, қурилиш соҳасида қуйидаги талаблар жорий этилмоқда:
қурилиш объектларини фон мониторинг станциялари билан жиҳозлаш ҳамда уларни Экология ва иқлим ўзгариши миллий қўмитасининг ягона геоахборот маълумотлар базасига интеграция қилиш;
онлайн назорат қилиш учун қурилиш майдони бўйлаб ва чиқиш нуқталарида онлайн камералар ўрнатиш ва Экология қўмитасининг ягона геоахборот маълумотлар базасига интеграция қилиш;
ҳуқуқбузарлик содир этган қурилиш ташкилотларининг «Шаффоф қурилиш» миллий ахборот тизимидаги рейтинг балларини камайтириш амалиётини жорий қилиш;
қурилиш объектлари бўйича лойиҳа-смета ва шаҳарсозлик ҳужжатларини экспертизадан ўтказишда мажбурий равишда экологик экспертиза хулосасини тақдим этиш.
Бундан ташқари, баландлиги 12 метрдан ва (ёки) умумий майдони 500 квадрат метрдан ортиқ бўлган янги қурилаётган бино ва иншоотларни лойиҳалаштиришда (якка тартибдаги уй-жойлар бундан мустасно) туташ ҳудудни кўкаламзорлаштириш майдони (дарахтлар, буталар ва бошқа ўсимликлар экиш) ажратилган ер участкаси умумий майдонининг камида 30%ини ташкил этиши керак (эскирган объектларни реновация қилиш бундан мустасно).
2026 йил 1 декабрга қадар бир ҳудудда камида 1 гектар майдонда дарахт баргларини йиғиш, кейинчалик уларни биологик усулда чиритиш (компостлаш) орқали олинган органик моддалардан компост сифатида ва мулчалашда фойдаланиш тизими жорий этилади.
2027 йил 1 майга қадар хорижий компания ва илмий-тадқиқот институтларини жалб қилган ҳолда Тошкент шаҳрининг 2035 йилгача мўлжалланган экологик ва сув хўжалигини бошқариш бўйича мастер-режа ишлаб чиқилади.
Фармонда экологик ва қурилиш экспертизаси хулосаларини олишда «шамол гули» йўлаклари ҳаракатини ҳисобга олиш талаби мажбурийлиги белгиланган. Ҳудудларнинг бош режаларида «шамол йўлаклари» тасдиқланади.
«Уй-жой-коммунал хўжалиги» бўлимини махсус мухбиримиз Ирина ГРЕБЕНЮК олиб боради.