Сейсмик хавфсизлик чоралари кучайтирилади

2017 йилдан бошлаб мамлакатда аҳолининг турмуш шароитларини яхшилашга ёрдам берувчи 11 410 та кўп квартирали уй қурилди. Давлат раҳбари сейсмик хавфсизлик чораларини кучайтириш бўйича таклифлар тақдимотида янги қурилишлар сифатига эътиборни кучайтириш вазифасини қўйди. Қайд этилишича, шу муносабат билан кўп квартирали уйларнинг зилзилага бардошлилигини ошириш ва ер силкинишларида аҳоли хавфсизлигини таъминлаш бўйича чоралар кўрилмоқда. Давлат лойиҳа институтлари мутахассислари томонидан жойларда тадқиқотлар ва вилоятлардаги сейсмик вазиятни таҳлил қилиш ишлари олиб борилди. Шу асосда сейсмик хавфсизлик тизимини янада такомиллаштириш бўйича таклифлар ишлаб чиқилди.