Ўзини ўзи банд қилишни расмийлаштирмоқчиман.
Буни қандай тўғри амалга ошириш мумкин? Стажимни йўқотмаслик учун қандай солиқни тўлашим лозим?
– Сиз махсус мобиль илова ёхуд my.soliq.uz электрон хизматларидан фойдаланган ҳолда солиқ органларида рўйхатдан ўтишингиз лозим. Рўйхатдан ўтганингиздан сўнг сизга матрицали штрих код (QR-код) берилади (8.06.2020 йилдаги ПҚ-4742-сон қарор 3-б.).
Меҳнат стажи ва иш ҳақи ҳисобланиши учун сиз бир йилда бир марта ихтиёрий тартибда БҲМнинг 1 баравари миқдорида ижтимоий солиқни тўлашингиз керак бўлади. Ҳозир БҲМ 245 000 сўмга тенг (СК 408-м. 2-қ.; 30.12.2020 йилдаги ПҚ-4938-сон қарор 1-б.).
Ўзини ўзи банд қилган шахслар 2020 йил учун ижтимоий солиқни ўзини ўзи банд қилган шахс сифатида ҳақиқатда ишлаган вақтидан қатъи назар БҲМнинг камида 50%и ҳажмида тўлайди. Ушбу сумма тўлиқлигича Пенсия жамғармасига йўналтирилади ва ундан келиб чиққан ҳолда якка тартибдаги тадбиркорлар учун ўрнатилган тартибда пенсия ҳисоблаш учун даромад ҳажми аниқланади (8.06.2020 йилдаги ПҚ-4742-сон қарор 3-б.).