Божхона органлари сифати кафолатланмаган товар-моддий бойликларнинг божхона чегаралари орқали олиб ўтилиши олдини олишда сергакликни қўлдан бой бераётганлари йўқ.
Тошкент шаҳар божхона бошқармаси Контрабандага қарши курашиш ва божхона аудити бўлими ходимлари «Тошкент-товар» божхона пости ходимлари билан ҳамкорликда «Чуқурсой техник-идора» темир йўл чегара божхона пости орқали Қўқон шаҳрида фаолият юритувчи МЧЖ номига келтирилган юк контейнерини белгиланган тартибда божхона назоратидан ўтказишди.
Натижада йўл-юк кузатув ҳужжатларида кўрсатилганидан ортиқча бўлган оғирлиги ярим тоннани ташкил этувчи салкам 316 млн сўмлик велосипед шиналари борлиги аниқланди. Дастлабки ҳисоб-китобларга кўра, мазкур товарларга 121 млн сўмдан ортиқ қўшимча божхона тўловлари ҳисобланди.