Бизнинг МЧЖ корхона ҳудудининг ичкарисидаги йўлларга (бинолар орасидаги) асфальт ётқазди. Ушбу харажатлар ободонлаштириш счётига киритилган.
Ушбу харажатлар қандай ҳисобга олинади ва қандай солиқ оқибатлари юзага келиши мумкин?
– Корхона ичкарисидаги ҳудудларни асфальтлаш харажатлари ер майдонларини такомиллаштиришга оид харажатлар ҳисобланади. Ерни ободонлаштириш билан боғлиқ барча харажатлар 0850-«Ерни ободонлаштиришга капитал қўйилмалар» счётида ҳисобга олинади.
Ободонлаштириш ишлари тугаганидан кейин капитал қўйилмалар суммаси асосий воситалар таркибига киритилади ва бундан кейинги ҳисоб 0111-«Ерни ободонлаштириш» счётида юритилади.
Ободонлаштириш қиймати амортизация орқали давр харажатларига киритилади. Жамланган амортизация суммаси 0211-«Ерни ободонлаштиришнинг эскириши» счётида ҳисобга олинади.
Фойда солиғини солиш мақсадларида амортизация суммаси СК 306-моддасига мувофиқ харажатларга киритилади.
Ерни ободонлаштириш мол-мулк солиғи солиш объекти ҳисобланмайди.
Замира ЖЎРАЕВА, «Norma» МЧЖ эксперти.