Тошкент халқаро аэропорти божхоначилари кўп миқдордаги тиббий буюмларнинг ноқонуний олиб кирилишининг олдини олишди.
«Москва-Тошкент» рейси бўйича парвозини якунлар экан, фуқаро З.Б. божхона чегарасидан «яшил» йўлак орқали ўтади. Бу билан у ёнида тақиқланган ёки ортиқча юклари йўқлигини маълум қилган бўлди. Лекин божхона ходимларида шубҳа уйғотгани сабабли унинг юклари белгиланган тартибда божхона кўригидан ўтказилади.
Қарангки, З.Б. юклар орасида божхона назоратида тақдим қилинмаган ва божхона ходимининг оғзаки сўрови пайтида айтилмаган, умумий нархи дастлабки суриштирувларга кўра 60 млн сўмлик 14 турдаги стоматологик тиббий буюмларни олиб киришга уринган экан.
Айни шу рейс билан учиб келган яна бир йўловчи А.Ж. ҳам божхона чегарасидан «яшил» йўлак орқали 29 турдаги 113 дона дори воситалари ва тиббиёт буюмларини олиб ўтишга уринади. Ушбу шахс қиймати 25 млн сўмлик ушбу товарлар ҳақида йўловчи божхона декларациясида ҳам, божхона ходимларининг оғзаки сўрови пайтида ҳам маълум қилмаганидан энди пушаймон қилаётган бўлса не ажаб...
Ҳозирда ушбу ҳолатлар юзасидан божхона текширувлари ва суриштирув ҳаракатлари бошлаб юборилган.
«Тошкент-Аэро» ИБК
Ахборот хизмати.
