Корхона (МЧЖ) завод қурилишини якунламоқда, цемент ишлаб чиқариш ниятида. Солиқ солишнинг соддалаштирилган тизими қўлланилади. Биз фойдали қазилмаларни кавлаб олмаймиз, балки уларни сотиб оламиз.
Кичик корхона қўшимча фойда солиғи тўловчиси ҳисобланадими?
У.Носирова.
– Айрим фойдали қазилмаларни (фойдали компонентларни) кавлаб олишни (ажратиб олишни) амалга оширувчи ер қаъридан фойдаланувчилардан ташқари, солиқ солишнинг соддалаштирилган тартибини қўлловчи ва фойдали қазилмалардан ишлаб чиқариладиган маҳсулотни (цементни) ишлаб чиқаришни амалга оширувчи юридик шахслар ҳам қўшимча фойда солиғи тўловчилар ҳисобланади (Солиқ кодексининг 248-моддаси 2-қисми, 349-моддаси 1-қисми; АВ томонидан 24.02.2009 йилда 1908-сон билан рўйхатдан ўтказилган Низомнинг 4-банди).
Цементга қўшимча фойда солиғини ҳисоблаб чиқариш ва тўлаш тартиби Солиқ кодексининг 44-боби ва 1908-сон Низом билан тартибга солинади, у оқ цемент, шунингдек муқобил ёқилғи – кўмир асосида ишлаб чиқарилган цемент ва клинкер ишлаб чиқаришга татбиқ этилмайди.
2018 йилда цемент ишлаб чиқарувчилар қўшимча фойда солиғини 1 тонна учун 145 000 сўмдан юқори солиқ солинадиган базанинг 50%лик ставкаси бўйича тўлашлари керак (29.12.2017 йилдаги ПҚ-3454-сон қарорга 16-илова).
Анжелика НАМ,
«Norma» МЧЖ эксперти.
