Биз товар бойликларига хизмат кўрсатадиган бўлинмада ишлаймиз, бу ерда жамоавий (бригада) моддий жавобгарлик жорий этилган.
Шанба куни, кечки муҳокамадан кейин, биз ишдан бўшашга қарор қилдик. Ҳаммамиз 2013 йил 1 июнь санасида рўйхатдан ўтказган ҳолда меҳнат муносабатларини бекор қилиш санасини кўрсатмасдан ўз хоҳишимиз билан ишдан бўшаш тўғрисида ариза ёздик.
Душанба куни биз кадрлар бўлимига қўнғироқ қилиб, 15 июнь куни айни қайси соатда меҳнат дафтарчаларимизни олиш учун боришимиз кераклигини сўрадик. Бироқ инвентаризациялаш натижаларидан кейингина бизни қайси модда бўйича ишдан бўшатишлари маълум бўлади деб жавоб беришди.
Биз ишлаяпмиз, бироқ инвентаризациялаш ҳали бошланмади.
Қандай йўл тутайлик?
Галина, Настя ва Светлана.
Тошкент шаҳри.
– Амалдаги Меҳнат кодекси (МК) иш берувчиларга бирор-бир асосларга кўра ходимларни ишдан бўшатишни орқага суриб, бунда иш ҳақи ва якуний ҳисоб-китоб пулини тўламаслик ҳамда меҳнат дафтарчаларини бермаслик ҳуқуқини бермайди, чунки қонун ҳужжатларида моддий жавобгар шахслар билан меҳнат шартномасини бекор қилишнинг алоҳида тартиби назарда тутилмаган.
МКнинг 107 ва 108-моддаларига мувофиқ меҳнат шартномаси бекор қилинган куни иш берувчи ходимга унинг меҳнат дафтарчасини ва меҳнат шартномасининг бекор қилиниши (сизнинг ҳолатда – 2013 йил 15 июнь) ҳақидаги буйруқнинг нусхасини бериши шарт.
Иш берувчининг айби билан меҳнат дафтарчасини бериш кечиктирилса, у ҳолда бутун кечиктирилган давр учун ходимга ўртача ойлик иш ҳақи тўланади (масалан, моддий жавобгар ходимни бириктирилган анжомларни вақтида топширмаганлиги учун баҳона қилиб меҳнат дафтарчасини бериш кечиктирилса). Бундай ҳолда ишдан бўшаш куни деб меҳнат дафтарчаси берилган кун ҳисобланади. Ишдан бўшаган кунининг янги санаси тўғрисида буйруқ берилиб, ходимнинг меҳнат дафтарчасига ёзиб қўйилади. Меҳнат шартномасини бекор қилиш тўғрисида илгари киритилган ёзув, Меҳнат дафтарчаларини юритиш тартиби тўғрисида йўриқноманинг (АВ томонидан 29.01.1998 йилда 402-сон билан рўйхатдан ўтказилган) 2.18-бандида белгиланган тартибда бекор қилинади.
Иш берувчи томонидан ушбу талаблар бажарилмаган тақдирда сиз меҳнат тўғрисидаги қонун ҳужжатлари аниқ ва бир хилда бажарилишини назорат қиладиган Давлат меҳнат ҳуқуқ инспекцияси ёки прокуратурага мурожаат қилишга ҳақлисиз. Текшириш давомида бундай ҳуқуқбузарликлар аниқланганда иш берувчи Маъмурий жавобгарлик тўғрисидаги кодекснинг 49-моддасида назарда тутилган, ҳуқуқларингизни тиклаган ҳолда, энг кам иш ҳақининг 2 бараваридан 5 бараваригача миқдорни ташкил этадиган жарима тарзида жавобгарликка тортилиши мумкин.
