Қуйидаги вазият бўйича тушунтириш берсангиз. Хусусий фирма Россияда ишлаб чиқарилган товарлар олади (РФда берилган СТ-1 сертификати мавжуд). Юкларни жўнатувчи – Россия компанияси, бироқ товарлар буюртирилиб, уларни етказиб бериш контракти Австрия компанияларининг бири билан имзоланган. Уларга нисбатан Эркин савдо зонаси тўғрисидаги битим доирасида бериладиган имтиёзлар амал қиладими? Божхона юк декларациясининг 36-«Преференциялар» устунида қандай кодни кўрсатиш зарур?
– Импорт божхона божларини ҳисоблаш ва ундириш тартибига1 мувофиқ белгиланган ставкалар миқдоридаги божхона божлари, товарни жўнатиш мамлакати ва экспортчидан қатъи назар, савдо-иқтисодий муносабатларда Ўзбекистон энг яхши қулайлик режимини ўрнатган мамлакатлардан келиб чиққан товарларга нисбатан қўлланади. Сиз Австрия компанияси билан товарларни етказиб беришга шартнома тузгансиз, Австрия эса Энг яхши қулайлик режими тақдим этиладиган савдо-иқтисодий ҳамкорлик тўғрисидаги битимлар имзоланган мамлакатлар рўйхатига2 кириши боис, сизнинг товарларингизга Ўзбекистон Республикаси ҳудудига олиб кириладиган товарларга импорт божхона божлари ставкаларига3 мувофиқ божхона божи солинади.
Ўзбекистон Эркин савдо зонасини ташкил этиш тўғрисидаги битим4 тузган мамлакатлардан келиб чиққан товарларга божхона божлари:
қўлланмайди, агар товар мазкур Битим иштирокчиларидан бири бўлган давлатлардан бирининг резиденти томонидан экспорт қилинса ва мазкур Битим иштирокчиси бўлган давлатнинг резиденти томонидан Битим иштирокчиси бўлган бошқа давлатнинг божхона ҳудудидан олиб кирилса (олиб қўйишлар тўғрисидаги баённомаларга киритилган товарлардан ташқари). Бунда резидент деганда ушбу давлат ҳудудида ташкил этилган ташкилот ёки ушбу давлат ҳудудида яшайдиган жисмоний шахс тушунилади;
бошқа ҳолларда – белгиланган ставкалар миқдорида қўлланилади.
Сизнинг вазиятингиз айни бошқа ҳолларга киради.
БЮДнинг 36-«Преференциялар» устунига келсак, у Божхона юк декларациясини тўлдириш тартиби тўғрисидаги йўриқномага5 мувофиқ тўлдирилади. Унда қуйидаги чизма бўйича божхона тўловларини тўлашга доир берилган имтиёзлар, преференциялар ёки хусусиятлар Божхона тўловларини тўлашнинг преференциялари, имтиёзлари ва бошқа хусусиятларининг классификаторига (кўрсатилган Йўриқномага 9-илова) мувофиқ ҳарфли кодлари кўрсатилади:
1/2/3/4, бунда тегишинча:
1 – божхона расмийлаштируви учун божхона йиғимларини тўлаш бўйича хусусият коди;
2 – божхона божини тўлаш бўйича хусусият коди;
3 – акциз солиғини тўлаш бўйича хусусият коди;
4 – қўшилган қиймат солиғини тўлаш бўйича хусусият коди.
Сиз 36-«Божхона божларини тўлаш бўйича преференциялар, имтиёзлар ва бошқа хусусиятлар» устунининг 2-бандида «Ж» ҳарфли кодини кўрсатишингиз лозим, у эркин савдо режими ўрнатилган давлатлардан келиб чиқадиган ва олиб кириладиган товарларга нисбатан тариф преференциясини англатади.
1ТИАВ, МВ ва ДБҚ томонидан тасдиқланган, АВ томонидан 27.07.1999 йилда 782-сон билан рўйхатдан ўтказилган.
2ТИАВ, МВ ва ДБҚ томонидан тасдиқланган, АВ томонидан 8.04.1998 йилда 426-сон билан рўйхатдан ўтказилган.
3Президентнинг 28.06.2011 йилдаги ПҚ-1560-сон қарори билан тасдиқланган.
4Москва, 15.04.1994 йил. Ўзбекистон Республикаси учун 1994 йил 30 декабрдан кучга кирган.
5ДБҚ томонидан тасдиқланган, АВ томонидан 3.11.1999 йилда 834-сон билан рўйхатдан ўтказилган.
«Божхона» бўлимини махсус мухбиримиз Гулнора АБДУНАЗАРОВА олиб боради.
