Бир нечта саволимга жавоб берсангиз. Агар ускунанинг ТИФ ТН коди – 8452 21 000 0, эҳтиёт қисмларники – 8452 90 000 0 бўлса, технологик ускуна олиб кирилганда унинг эҳтиёт қисмларига имтиёзлар татбиқ этиладими?
Ўзбекистон Республикаси ҳудудига олиб киришда импорт божхона божи ва қўшимча қиймат солиғидан озод қилинадиган технологик жиҳозлар, бутловчи буюм ва эҳтиёт қисмлар рўйхатида (АВ томонидан 3.05.2008 йилда 1802-сон билан рўйхатдан ўтказилган) кўрсатилишича, имтиёзлар, шунингдек, 8448-товар позициясидаги ускунага берилади, унинг қисқа номи тагида «8444, 8445, 8446 ёки 8447-товар позицияли машиналардан фойдаланиш учун қўшимча жиҳозлар» расшифровкаси берилган. Бу ТИФ ТН 8448 31 000 0 кодидаги маҳсулотларга ҳам шундай имтиёзлар берилади деганими?
Г.Шукурова.
– Солиқ кодексининг 211-моддаси ва «Бож тарифи тўғрисида»ги Қонуннинг (29.08.1997 йилдаги 470-I-сон) 33-моддасига кўра тасдиқланадиган рўйхатга кирадиган Ўзбекистон Республикасига олиб кириладиган технологик ускуналар импорт божхона божи ва қўшилган қиймат солиғини тўлашдан озод қилинган. Ҳозирги вақтда ушбу имтиёзлар Ўзбекистон Республикаси ҳудудига олиб киришда импорт божхона божи ва қўшилган қиймат солиғидан озод қилинадиган технологик жиҳозлар рўйхатига1 (бундан кейин – 2436-сон Рўйхат) мувофиқ берилади.
Импорт божхона божи ва ҚҚС тўлови бўйича имтиёзлар 2436-сон Рўйхатга ТИФ ТН кодлари киритилган янги технологик ускуналарга қўлланилади ҳамда бутловчи ва эҳтиёт қисмларга, агарда улар контрактга (шартномага) мувофиқ технологик жиҳозлар билан бирга ажралмас қисми сифатида етказиб берилган тақдирда, татбиқ қилинади. Бунда янги технологик ускуна деганда – эркин муомалага чиқариш божхона режимида божхона расмийлаштируви вақтида, унинг ишлаб чиқарилган йили 3 йилдан кўп бўлмаган технологик ускуна тушунилади. Унинг ишлаб чиқарилган йилини тасдиқлаш учун божхона органига ишлаб чиқарувчи заводнинг техник паспорти ёки бошқа тасдиқловчи ҳужжат тақдим этилиши лозим.
ТИФ ТН коди 8452 21 000 0 бўлган технологик ускуна 2436-сон Рўйхатга киритилган. Тегишинча, уни эҳтиёт қисмлар билан бутликда олиб кирилганда уларга ҳам имтиёзлар татбиқ этилади, яъни агар уларни олиб киришни технологик ускунани етказиб бериш контракти тақозо этган бўлса, уларга божхона божи ва ҚҚС солинмайди.
Шунга эътибор берингки, айтиб ўтилган имтиёзлар, шунингдек ишлаб чиқарилган йили 3 йилдан ортиқ бўлган тўқимачилик соҳаси корхоналарини ташкил этиш, модернизациялаш ва техник қайта жиҳозлаш бўйича инвестиция лойиҳаларини амалга ошириш учун тўғридан-тўғри инвестиция ҳисобига корхона устав фондига улуш сифатида келтириладиган технологик ускуналарга қўлланилади. Имтиёзларни қўллаш учун қуйидагилар асос бўлади:
«Ўзбекенгилсаноат» ДАК ва «Ўзенгсанлойиҳа» МЧЖнинг келтирилаётган ускунанинг замонавий технологиялар талабларига ва рақобатбардош маҳсулотлар ишлаб чиқаришни таъминлаши тўғрисидаги эксперт хулосаси;
импорт қилинаётган ускуналар ўрнатиладиган корхонанинг, ушбу ускуналарни корхона устав фондига улуш сифатида киритилишини кўрсатадиган таъсис ҳужжатлари (2436-сон Рўйхатга изоҳлар).
Кўрсатиб ўтилган ҳужжатлар ускуналарни «Эркин муомалага чиқариш» божхона режимида божхона расмийлаштируви вақтида божхона органига божхона юк декларацияси билан бирга тақдим этилиши зарур.
ТИФ ТН коди 8448 бўлган ускунага келсак, у ҳам 2436-сон Рўйхатга 8444, 8445, 8446 ёки 8447-товар позицияли машиналардан фойдаланиш учун қўшимча жиҳозлар сифатида киритилган. Тегишинча, ушбу гуруҳга ҳам божхона имтиёзлари татбиқ этилади.
Маълумот учун! ИВ, МВ, ТИАИСВ ва ДБҚ томонидан тасдиқланган, Адлия вазирлиги томонидан 2013 йил 20 мартда рўйхатдан ўтказилган янги Ўзбекистон Республикаси ҳудудига олиб киришда импорт божхона божи ва қўшилган қиймат солиғидан озод қилинадиган технологик жиҳозлар рўйхати муносабати билан эслатамиз: Божхона кодексининг 4-моддасида назарда тутилишича, божхона ишида божхона органи божхона юк декларациясини қабул қилиб олаётган куни амалда бўлган қонун ҳужжатлари қўлланилади.
1ИВ, МВ, ТИАИСВ ва ДБҚнинг АВ томонидан 20.03.2013 йилда 2436-сон билан рўйхатдан ўтказилган қарори билан тасдиқланган.
«Божхона» бўлимини махсус мухбиримиз Гулнора АБДУНАЗАРОВА олиб боради.
