29 январь куни Ўзбекистон Республикаси Олий Мажлиси Қонунчилик палатасининг навбатдаги мажлиси бўлиб ўтди. Қонунчилик палатасининг Кенгаши таклиф этган кун тартиби тасдиқлангандан кейин депутатлар бир қатор қонун лойиҳаларини кўриб чиқишди.
Монополчилар сафидан чиқарилади
«Табиий монополиялар тўғрисида»ги Ўзбекистон Республикаси Қонунининг 4-моддасига ўзгартиш киритиш ҳақида»ги қонун лойиҳасига кўра, табиий монополиялар субъектларининг фаолиятини давлат томонидан тартибга солиш рўйхатидан транспорт терминаллари хизматларини чиқариб ташлаш таклиф этилмоқда. Бу иштирокчилар сонининг кўпайиши ҳисобига бозорнинг фаол ривожланиши, истеъмолчилар талабининг қондирилиши билан изоҳланади. Фаолиятнинг мазкур турини белгиланган талабларга мос келадиган муайян ҳудудга, жиҳозланган биноларга, ходимларга ва техник имкониятларга эга бўлган ҳамда тегишли божхона органидан лицензия олган ҳар қандай корхона амалга ошириши мумкин.
ҲУҚУҚИЙ ЁРДАМ КЎРСАТИШ ОСОНЛАШАДИ
Депутатлар «Ўзбекистон Республикаси билан Корея Республикаси ўртасида фуқаролик ва хўжалик ишлари бўйича ҳуқуқий ёрдам тўғрисидаги Шартномани (Сеул, 2012 йил 20 сентябрь) ратификация қилиш ҳақида»ги Қонунни муҳокама этдилар ва қабул қилдилар. Мазкур Шартнома фуқаролик ва хўжалик ишлари бўйича ҳуқуқий ёрдам кўрсатиш учун Ўзбекистон Республикаси билан Корея Республикасининг фуқаролари ва юридик шахсларига қулай шарт-шароит яратади. Шартноманинг мақсади суд ҳужжатларини топшириш, далиллар тўплаш, ҳуқуқий маълумотлар ва ишларни судда юритиш материалларини алмашишга доир суд тартиб-таомилларини соддалаштириш ҳамда енгиллаштиришдан иборатдир.
НОҚОНУНИЙ МИГРАЦИЯГА ҚАРШИ
Депутатлар томонидан кўриб чиқилиб, қабул қилинган «Мустақил Давлатлар Ҳамдўстлигига аъзо давлатларнинг ноқонуний миграцияга қарши курашда ҳамкорлик қилиши тўғрисидаги Битимга (Москва, 1998 йил 6 март) Ўзбекистон Республикасининг қўшилиши ҳақида»ги Қонун ноқонуний миграция билан боғлиқ замонавий хавф-хатарларга қарши самаралироқ курашишга кўмаклашади. Битимда ноқонуний мигрантларни депортация қилиш, ахборот алмашиш ва кадрлар малакасини ошириш борасида ҳамкорлик қилиш чора-тадбирлари назарда тутилган.
Қабул қилинган қонунлар кейинги кўриб чиқиш учун Олий Мажлис Сенатига юборилади.
ФАРЗАНДЛИККА ОЛИШДА БОЛА МАНФААТИ УСТУВОР БЎЛСИН!
«Ўзбекистон Республикасининг Фуқаролик процессуал кодексига ва Ўзбекистон Республикасининг Оила кодексига оила институтини такомиллаштиришга қаратилган ўзгартиш ва қўшимчалар киритиш тўғрисида»ги қонун лойиҳаси болаларни фарзандликка олишга доир ишларни кўриб чиқишнинг суд тартиби белгилаб қўйилишини назарда тутади. Мустақиллик йилларида давлатимиз раҳбарининг ташаббуси билан Ўзбекистонда ота-онаси қарамоғидан маҳрум бўлган болаларни жойлаштиришнинг такомиллашган тизими вужудга келтирилди. «Меҳрибонлик уйи» болалар муассасасига жойлаштирилган болалар учун давлат томонидан энг жиддий талабларга жавоб берадиган барча зарур шарт-шароит яратилган. Шу билан бирга, ота-она ғамхўрлигидан маҳрум бўлган болаларни оила тарбиясига, шу жумладан, фарзандликка бериш масаласига ҳам етарлича эътибор қаратилмоқда.
Таклиф этилаётган янгилик, биринчи навбатда, фарзандликка берилаётган болалар манфаатларини ҳимоя қилиш кафолатларини кучайтиришга қаратилган. Қонун лойиҳасида фарзандликка олиш тўғрисидаги ишларни кўриб чиқишнинг бола манфаатларини кўзлаган ҳолда, фарзандликка олувчининг шахси, ахлоқий фазилатлари, оилавий, ижтимоий ва иқтисодий аҳволи холисона текширилишини таъминлайдиган қатъий процессуал тартиби белгилаб қўйилиши назарда тутилган. Унинг қабул қилиниши фарзандликка олиш институтини ривожлантириш имконини беради, бу эса ота-она қарамоғидан маҳрум бўлган болаларнинг оилада муносиб тарбия олишини таъминлайди.
Депутатлар қонун лойиҳаси ушбу соҳадаги ҳам миллий, ҳам халқаро тажрибани ҳисобга олганлигини таъкидладилар.
Депутатлар ушбу қонун лойиҳасининг концепциясини маъқулладилар ва уни биринчи ўқишда қабул қилиб, ҳужжатни иккинчи ўқишда кўриб чиқиш учун тайёрлашни масъул қўмитага топширдилар.
Ўзбекистон Республикаси Олий Мажлиси Қонунчилик палатасининг Ахборот хизмати материали асосида тайёрланди.
