Агар пенсионер ой бошида вафот этиб, пенсиясини олмаган бўлса, қариндошлари уни олиш учун банкка мурожаат қилишлари мумкинми?
– «Фуқароларнинг давлат пенсия таъминоти тўғрисида»ги Қонуннинг (03.09.1993 й. 938-XII-сон ЎРҚ) 63-моддасига мувофиқ пенсионер олиши лозим бўлган ва унинг вафоти муносабати билан олинмай қолган пенсия пули мерос таркибига киритилмасдан боқувчисини йўқотганлик пенсияси билан таъминланадиган шахслар (Қонун 19-20-м.) доирасига кирувчи оила аъзоларига тўланади.
Ота-онаси, эри (хотини), шунингдек пенсионер билан у вафот этган кунигача биргаликда яшаб турган оила аъзолари бу пулни, агар улар нафақа билан таъминланадиганлар доирасига кирмаганлари тақдирида ҳам олиш ҳуқуқига эгадирлар.
Пенсионер вафот этган ой учун олинмай қолган пенсия пули кўрсатиб ўтилган оила аъзоларига ушбу ой учун тўлиқ тўланади. Оиланинг бир неча аъзоси мурожаат этган тақдирда, пенсиянинг уларга тегишли суммаси уларнинг ўртасида тенг тақсимланади.
Пенсионернинг вафоти муносабати билан олинмай қолган пенсия пули, агар уни олиш учун пенсионер вафот этганидан кейин олтмиш кундан кечиктирмай мурожаат қилинган бўлса, тўланади.
Зафаржон ХЎЖАEВ, «Норма» эксперти.
«Пенсия иши» бўлимини махсус мухбиримиз Алла РОМАШКО олиб боради.