Президентнинг 14.02.2025 йилдаги «Ёшлар тадбиркорлигини ривожлантириш ва бандлигини таъминлашга доир қўшимча чора-тадбирлар тўғрисида»ги ПҚ-62-сон қарори имзоланди.
2025–2027 йилларда «Ёшлар бизнеси» дастури амалга оширилади. АТ «Алоқабанк» ёш тадбиркорларга комплекс хизматлар кўрсатиш учун базавий «ёшлар банки» этиб белгиланди.
«Бизнесга биринчи қадам» лойиҳасига мувофиқ 18–30 ёшдаги ижтимоий солиқ тўлаган ўзини ўзи банд қилганларга онлайн шаклда асосий қарздан 2 йилгача ва фоиз тўловларидан 3 ойгача имтиёзли давр билан 7 йилгача муддатга суғурта полиси таъминоти ёки учинчи шахс кафиллиги асосида 100 млн сўмгача маблағлар қуйидаги кредит маҳсулотлари бўйича имтиёзли микроқарз сифатида ажратилади:
● томорқалардан самарали фойдаланиш мақсадида экин экиш ва етиштириш, чорвачилик, паррандачилик ҳамда қишлоқ хўжалигининг бошқа йўналишларидаги фаолиятни амалга ошириш учун;
● ишлаб чиқариш ва хизмат кўрсатиш фаолиятини ташкил этиш ҳамда амалга ошириш, шу жумладан, ҳунармандчилик жиҳозларини сотиб олиш ва айланма маблағларни тўлдиришга;
● фан, санъат ва спорт йўналишларида ўз қобилиятини намоён этган иқтидорли ёшларни ҳамда фрилансерлик хизматларини кўрсатувчи ёшларни қўллаб-қувватлаш учун.
«Ёшлар учун иш ўринлари» лойиҳаси асосида ЯТТ сифатида фаолият юритувчи ёш фуқароларга, шунингдек таъсисчилари ёш фуқаролар бўлган юридик шахс ташкил этган ҳолда фаолият юритувчи кичик тадбиркорлик субъектларининг ёшларга камида 20 та иш ўрни яратишни назарда тутувчи лойиҳаларига 2 йилгача имтиёзли давр билан 7 йилгача муддатга 5 млрд сўмгача маблағлар қуйидаги йўналишлардаги кредит маҳсулотлари бўйича ажратилади:
● ишлаб чиқариш асбоб-ускуналарини харид қилиш, қурилиш ишларини амалга ошириш, асосий воситаларни сотиб олиш (шу жумладан, «саноат ипотекаси» асосида) ҳамда айланма маблағларга;
● тижорат мақсадларида фойдаланишга мўлжалланган автотранспорт воситаларини харид қилиш учун;
● савдо ва хизмат кўрсатиш шохобчаларини ташкил қилишга;
● ёшларни технологиялар касб-ҳунарига ўқитиш, шу жумладан рақамли ва хорижий тиллар каби йўналишларда таълим хизматлари фаолиятини ташкил этиш учун.
Ҳужжат Қонун ҳужжатлари маълумотлари миллий базасида (lex.uz) эълон қилинган ва 18.02.2025 йилдан кучга кирди.
Собир НУРБЕРДИЕВ.