Имтиёзли шартларда пенсия тайинланганда иш стажини бундай бирга ҳисобга олишни мисолда тушунтириб беринг.
– Пенсияга чиқиш учун умумбелгиланган ёшни камайтирган ҳолда пенсияга чиқиш ҳуқуқини берадиган ишлар, касблар ва лавозимларнинг 3 та рўйхати мавжуд. Ушбу Рўйхатлар Вазирлар Маҳкамасининг 1994 йил 12 майдаги 250-сон қарор билан тасдиқланган.
Ходимнинг турли рўйхатлар бўйича меҳнат фаолияти турли даврларда амалга оширилган ҳолатларда иш стажини ўзаро ҳисобга олиш шарти қўлланилади.
Йўриқномага (АВ рўйхат рақами 2337, 12.03.2012 й.) 2-иловада «Фуқароларнинг давлат пенсия таъминоти тўғрисида»ги Қонуннинг 41-моддасига мувофиқ имтиёзли шартларда ёшга доир пенсия тайинлашда махсус стажнинг йиғиндисини чиқариш (ўзаро ҳисобга олиш) жадвали келтирилган.
Масалан, шахс театр ва бошқа театр-томоша корхоналари артисти бўлиб 10 йил ишлаган. Мазкур турдаги ишлар 1-сон Рўйхатнинг IV қисмида назарда тутилган. Ушбу тоифага кирадиган шахслар ёшидан қатъи назар камида 20 йил ижодий иш стажи бўлганда пенсияга чиқиш ҳуқуқига эга бўлади.
Бироқ қолган 10 йилда ходим цирк ва концерт ташкилотининг артисти бўлиб ишлаган. Бундай иш 2-сон Рўйхатнинг II қисмида кўрсатилган ва камида 20 йил ижодий меҳнат стажига эга бўлганда умумбелгиланган ёшни 10 йилга камайтирган ҳолда пенсияга чиқиш ҳуқуқини беради.
Иш стажини ўзаро ҳисобга олиш жадвалининг 5-бандига мувофиқ ушбу ходим (агар хоҳласа) цирк ва концерт ташкилотларининг артисти сифатида умумбелгиланган ёшни 10 йилга камайтирган ҳолда пенсияга чиқиши мумкин (2-сон Рўйхатнинг II қисми).
Зафаржон Хўжаев, «Норма» компанияси эксперти.
Мавзувий сонни махсус мухбиримиз Алла Ромашко олиб боради.