«Маъмурий ислоҳотлар доирасида қишлоқ хўжалиги ва озиқ-овқат соҳасида давлат бошқарувини самарали ташкил қилиш чора-тадбирлари тўғрисида»

Ўзбекистон Республикаси Президентининг 2023 йил 25 январдаги «Республика ижро этувчи ҳокимият органлари фаолиятини самарали йўлга қўйишга доир биринчи навбатдаги ташкилий чора-тадбирлар тўғрисида»ги ПФ-14-сон Фармони ижросини таъминлаш мақсадида:

1. Қуйидагилар:

Қишлоқ хўжалиги вазирлиги фаолиятининг устувор йўналишлари 1-иловага** мувофиқ;

Қишлоқ хўжалиги вазирлигининг ташкилий тузилмаси ­2-иловага** мувофиқ;

Ветеринария ва чорвачиликни ривожлантириш қўмитасининг ташкилий тузилмаси 3-иловага** мувофиқ;

Ипакчилик ва жун саноатини ривожлантириш қўмитасининг ташкилий тузилмаси 4-иловага** мувофиқ;

Ўсимликлар карантини ва ҳимояси агентлигининг ташкилий тузилмаси 5-иловага** мувофиқ;

Қишлоқ хўжалигида хизматлар кўрсатиш агентлигининг ташкилий тузилмаси 6-иловага** мувофиқ;

Агросаноат мажмуи устидан назорат қилиш инспекциясининг ташкилий тузилмаси 7-иловага** мувофиқ;

Қишлоқ хўжалиги соҳасида ислоҳотларни чуқурлаштириш ва тизим фаолиятини трансформация қилиш бўйича «йўл харитаси» 8-иловага** мувофиқ;

Қишлоқ хўжалиги вазирлиги ва унинг тизимидаги ходимларни моддий қўллаб-қувватлаш бўйича чоралар 9-иловага мувофиқ тасдиқлансин.

2. Қишлоқ хўжалиги вазирлиги (кейинги ўринларда – Вазирлик)нинг қишлоқ хўжалиги ерларини муҳофаза қилишда давлат назоратини амалга ошириш бўйича штат бирликлари молиялаштиришнинг амалдаги тартибини сақлаб қолган ҳолда Агросаноат мажмуи устидан назорат қилиш инспекциясига ўтказилсин ҳамда Вазирликнинг ушбу соҳадаги вазифа ва функциялари мазкур Инспекция томонидан амалга оширилсин.

3. Белгилансинки, қишлоқ хўжалиги ва озиқ-овқат саноати соҳаларини ривожлантиришда:

а) 2026 йилгача бўлган даврга қадар қишлоқ хўжалигига ҳар йили 1 млрд АҚШ доллари миқдорида хорижий инвестицияларни жалб этиш ҳисобига қишлоқ хўжалиги маҳсулотлари ишлаб чиқариш ҳажми 35 млрд АҚШ долларига етказилади ва ҳар бир гектар суғориладиган ердан олинадиган даромадни 5 минг АҚШ долларига етказиш бўйича дастурлар амалга оширилади;

б) ҳар йили Вазирлик томонидан аҳоли, саноат корхоналари ҳамда ички ва ташқи бозор талабини ҳисобга олган ҳолда ҳудудларнинг ва асосий турдаги озиқ-овқат маҳсулотларининг прогноз кўрсаткичларини ҳамда уларнинг етишмаган қисмини ички имконият ҳисобига қоплаш юзасидан дастур ишлаб чиқилиб, ижроси таъминланади;

в) 2023 йил ҳосилидан бошлаб ҳар йили Вазирлик дала четлари ва аҳолига деҳқон хўжалигини юритиш учун ажратилган ер майдонларида қишлоқ хўжалиги экинларини экиш, агротехник тадбирларни ўтказиш ишларини фермер, деҳқон хўжаликлари, қишлоқ хўжалиги корхоналари кесимида ташкиллаштиришга кўмаклашади ҳамда маҳсулот етиштирувчиларнинг манфаатдорлигини таъминлаш бўйича билим ва кўникмаларини ошириб боради;

г) қишлоқ хўжалиги экинларини жойлаштиришнинг амалдаги механизмлари либераллаштирилади;

д) 2023 йил якунига қадар:

қишлоқ хўжалиги ва озиқ-овқат маҳсулотлари етиштирувчиларни турли хатарлардан ҳимоя қилиш ва барқарор даромад олишни кафолатлаш бўйича суғурталаш тизими яратилади;

қишлоқ хўжалиги соҳасида замонавий, ресурстежамкор техника ва технологияларни кенг жорий этиш учун лизинг операцияларни ривожлантириш ва рағбатлантириш чоралари кўрилади;

аҳолининг озиқ-овқат хавфсизлигини таъминлаш ва қишлоқ хўжалиги ерларига бўлган ижара ҳуқуқидан актив сифатида фойдаланишнинг ҳуқуқий механизмлари яратилади.

4. Шундай тартиб жорий этилсинки, унга мувофиқ Вазирлик тизимдаги раҳбарий фаолиятни яккабошчилик асосида ташкил этади ҳамда фаолиятининг устувор йўналишлари бўйича ўз тизимидаги республика ижро этувчи ҳокимият органлари ҳамда ўз ҳузуридаги ташкилотлар фаолиятини ўзаро мувофиқлаштирган ҳолда қуйидагиларни амалга оширади:

Вазирлик ва унинг тизимидаги республика ижро этувчи ҳокимият органлари ҳамда унинг ҳузуридаги ташкилотларнинг марказий аппаратларини, штат бирликларини, харажатлар сметасини тасдиқлаш ҳамда уларга тегишли ўзгартириш ва қўшимчалар киритиш, шунингдек, мол-мулкларини бошқариш;

Вазирлик ва унинг тизимидаги республика ижро этувчи ҳокимият органларининг раҳбар ўринбосарлари ва маслаҳатчиларини лавозимига тайинлаш учун номзодларни Ўзбекистон Республикаси Вазирлар Маҳкамасига тақдим қилиш;

Вазирлик ва унинг тизимидаги республика ижро этувчи ҳокимият органларига Давлат бюджети ҳисобидан ажратилган, улардан фойдаланишдан тежаладиган маблағларни қонунчиликка мувофиқ қайта тақсимлаш;

Вазирлик ва унинг тизимидаги республика ижро этувчи ҳокимият органлари ҳамда унинг ҳузуридаги ташкилотларнинг бюджетдан ташқари жамғармалари маблағларини жамғармалараро қайта тақсимлаш тартибини ва миқдорини белгилаш;

Вазирлик ва унинг тизимидаги республика ижро этувчи ҳокимият органлари ҳамда унинг ҳузуридаги ташкилотларга халқаро молия институтлари, хорижий давлатлар томонидан грантлар ва қарз маблағлари жалб қилиш ҳамда самарали ўзлаштирилишини мувофиқлаштириш;

бошқа соҳадаги вазирлик, идоралар ва хусусий сектордан ишга жалб қилинган ходимларга кўп йиллик хизмати учун ҳар ойлик устамаларни белгилаш.

5. Қишлоқ хўжалигида хизматлар кўрсатиш агентлигига узумчилик ва виночилик соҳасида қўшимча вазифалар юклатилсин.

Бунда, Вазирлик бир ҳафта муддатда Қишлоқ хўжалигида хизматлар кўрсатиш агентлигининг марказий аппаратида:

а) озиқ-овқат саноати хизматлари ва инновациялар бўйича директор ўринбосари лавозимини таъсис этиш;

б) қуйидагиларни:

Алкоголь, тамаки саноатини мувофиқлаштириш ва ишлаб чиқариш мониторингини юритиш бошқармаси;

Инновацияларни жорий этиш ва маҳсулот сифатини таҳлил қилиш бўлими;

Қишлоқ хўжалиги маҳсулотларини қайта ишлаш ва озиқ-овқат саноатига хизмат кўрсатиш бўлимини ташкил этиш чораларини кўрсин.

6. 2023 йил 1 январдан бошлаб Вазирликнинг ҳудудий бўлинмаларида ер тузиш ва мониторинг вазифалари юклатилган 657 нафар ходимнинг меҳнатига ҳақ тўлаш бўйича харажатлар Ўзбекистон Республикасининг Давлат бюджети маблағлари ҳисобидан молиялаштирилсин.

Бунда, ушбу харажатлар 2023 йилда Ўзбекистон Республикасининг республика бюджетидан Вазирлик ва унинг тизимидаги республика ижро этувчи ҳокимият органларига ажратилган бюджет маблағлари доирасида, 2024 йилдан бошлаб эса Ўзбекистон Республикасининг Давлат бюджети параметрларида кўзда тутилган маблағлар ҳисобидан амалга оширилади.

7. Қишлоқ хўжалиги ер майдонларини ижарага олиш ҳуқуқини қўлга киритиш учун ернинг норматив қийматидан келиб чиқиб ер участкасининг ижара муддатига ҳисобланадиган қўшимча тўловларнинг 50 фоизи Вазирлик ҳузуридаги Қишлоқ хўжалигини ривожлантириш ва озиқ-овқат таъминоти жамғармасига йўналтирилсин.

8. Шундай тартиб ўрнатилсинки, унга мувофиқ 2023 йил 10 июндан бошлаб:

а) Агросаноат мажмуи устидан назорат қилиш инспекциясига тадбиркорлик субъектларининг мансабдор шахслари ёки бошқа ходимлари томонидан Инспекция ваколати доирасидаги қонунчилик талабларини бузиш ҳолатлари бўйича маъмурий ҳуқуқбузарликлар тўғрисидаги ишларни кўриб чиқиш ва маъмурий жазоларни қўллаш ҳуқуқи берилади;

б) Агросаноат мажмуи устидан назорат қилиш инспекцияси томонидан мулкчилик шаклидан қатъи назар қишлоқ хўжалиги, мелиорация ва йўл-қурилиш техникаларидан фойдаланиш қоидаларига риоя этилиши устидан амалга ошириладиган назорат тадбирлари, истисно тариқасида, текширувларнинг «Ягона давлат назорати» ахборот тизимида рўйхатга олинмаган ҳолда амалга оширилади.

9. 2024 йил 1 октябрдан бошлаб Ўсимликлар карантини ва ҳимояси агентлигининг зарарсизлантириш (фумигация) бўлимларининг экспорт қилинадиган карантин остидаги маҳсулотларни зарарсизлантириш (фумигация) функцияси хусусий секторга ўтказилсин.

10. Вазирлик:

бир ой муддатда аграр соҳада илм-фан, таълим ва ишлаб чиқаришни интеграция қилиш орқали сифат ва самарадорликни оширишга оид тегишли қарор лойиҳаси;

икки ой муддатда Ўзбекистон Республикасининг озиқ-овқат хавфсизлиги ва соғлом озиқланишнинг 2023–2030 йилларга мўлжалланган стратегияси;

уч ой муддатда халқаро тажриба асосида қишлоқ хўжалигида иқлим ўзгаришига мослашиш, унинг оқибатларини юмшатиш Миллий дастурини ишлаб чиқиб, белгиланган тартибда Вазирлар Маҳкамасига киритсин.

11. Ўзбекистон Республикаси Президентининг ва Ўзбекистон Республикаси Ҳукуматининг айрим қарорларига 10-иловага мувофиқ ўзгартириш ва қўшимчалар киритилсин;

12. Ўзбекистон Республикаси Президентининг ва Ўзбекистон Республикаси Ҳукуматининг айрим ҳужжатлари 11-иловага мувофиқ ўз кучини йўқотган деб ҳисоблансин.

13. Мазкур Фармоннинг ижросини самарали ташкил қилишга масъул ва шахсий жавобгар этиб қишлоқ хўжалиги вазири А.Б.Воитов белгилансин.

Фармон ижросини муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Ўзбекистон Республикасининг Бош вазири А.Н.Арипов зиммасига юклансин.

Ўзбекистон Республикаси Президенти

Ш.МИРЗИЁЕВ.

Тошкент ш.,

2023 йил 10 июнь

ПФ-90-сон.

ЎзР Президентининг 2023 йил 10 июндаги ПФ-90-сон Фармонига
9-ИЛОВА

ҚИШЛОҚ ХЎЖАЛИГИ ВАЗИРЛИГИ ВА УНИНГ ТИЗИМИДАГИ ХОДИМЛАРНИ МОДДИЙ ҚЎЛЛАБ-ҚУВВАТЛАШ БЎЙИЧА ЧОРАЛАР

1. Белгилаб қўйилсинки, 2024 йил 1 январдан бошлаб Ўзбекистон Республикаси Давлат бюджети ҳисобидан:

Қишлоқ хўжалиги вазирлиги (кейинги ўринларда – Вазирлик) ва унинг тизимидаги республика ижро этувчи ҳокимият органлари марказий аппарати ходимларига кўп йиллик хизмати учун рағбатлантириш коэффициентини ҳисобга олган ҳолда, лавозим маошига белгиланган коэффициентларда қуйидаги ҳажмларда ҳар ойда устама тўланади:

1 йилдан 5 йилгача – 0,2;

5 йилдан 10 йилгача – 0,3;

10 йилдан 15 йилгача – 0,4;

15 йилдан 20 йилгача – 0,6;

20 йилдан 25 йилгача – 0,8;

25 йилдан ортиқ – 1,0.

Вазирликнинг ҳудудий бўлинмалари ҳамда Вазирлик тизимидаги республика ижро этувчи ҳокимият органларининг ҳудудий бўлинмалари ходимларига кўп йиллик хизмат учун рағбатлантириш коэффициентини ҳисобга олган ҳолда, лавозим маошига белгиланган коэффициентларда қуйидаги ҳажмларда ҳар ойда устама тўланади:

1 йилдан 5 йилгача – 0,2;

5 йилдан 10 йилгача – 0,3;

10 йилдан 20 йилгача – 0,4;

20 йилдан ортиқ – 0,6.

2. 2024 йил 1 январдан бошлаб Ўзбекистон Республикаси Давлат бюджети маблағлари ҳисобидан Вазирлик марказий аппарати ходимларининг Ягона тариф сеткаси бўйича меҳнатга ҳақ тўлашнинг тасдиқланган разрядларига мувофиқ лавозим маошини белгилашда тариф коэффициенти – 1,8 бараварга, Вазирликнинг ҳудудий бўлинмалари ҳамда унинг тизимидаги республика ижро этувчи ҳокимият органлари ва уларнинг ҳудудий бўлинмаларида – 1,4 бараварга оширилган миқдорда қўлланилади.

3. Меҳнатга ҳақ тўлаш ягона тартиби чиққунга қадар, Вазирлик тизимидаги республика ижро этувчи ҳокимият органлари, тизим ташкилотларининг марказий аппарати ходимлари учун Вазирлик ходимларининг меҳнатга ҳақ тўлаш, Вазирлик тизимидаги республика ижро этувчи ҳокимияти органларининг ҳудудий бўлинмалари ходимлари учун Вазирлик ҳудудий бўлинмалари ходимларининг меҳнатга ҳақ тўлаш тартиблари қўлланилади.

Бунда, Вазирлик, унинг тизимидаги республика ижро этувчи ҳокимият органлари ва тизим ташкилотлари ҳамда уларнинг ҳудудий бўлинмалари ходимларини тегишлилиги бўйича бюджетдан ташқари жамғармалари маблағлари ҳисобидан қўшимча рағбатлантириш улар фаолиятининг натижадорлиги (KPI) ва эришилган ютуқларига қараб амалга оширилади.

ЎзР Президентининг 2023 йил 10 июндаги ПФ-90-сон Фармонига
10-ИЛОВА

ЎЗБЕКИСТОН РЕСПУБЛИКАСИ ПРЕЗИДЕНТИНИНГ ВА ЎЗБЕКИСТОН РЕСПУБЛИКАСИ ҲУКУМАТИНИНГ АЙРИМ ҲУЖЖАТЛАРИГА КИРИТИЛАЁТГАН ЎЗГАРТИРИШ ВА ҚЎШИМЧАЛАР

1. Ўзбекистон Республикаси Президентининг 2019 йил 28 мартдаги «Ветеринария ва чорвачилик соҳасида давлат бошқаруви тизимини тубдан такомиллаштириш чора-тадбирлари тўғрисида»ги ПФ-5696-сон Фармонида:

а) 1-бандда:

биринчи хатбошидаги «Ветеринария ва чорвачиликни ривожлантириш давлат қўмитаси» сўзлари «Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси (кейинги ўринларда – Ветеринария ва чорвачиликни ривожлантириш қўмитаси)» сўзлари билан алмаштирилсин;

иккинчи хатбошидаги «ветеринария, чорвачилик ва наслчилик соҳасида ягона давлат сиёсатини амалга ошириш,» сўзлари «ветеринария ва чорвачилик соҳасида» сўзлари билан алмаштирилсин;

б) 2-банднинг биринчи хатбошисидаги «Ветеринария ва чорвачиликни ривожлантириш давлат қўмитаси» сўзлари «Ветеринария ва чорвачиликни ривожлантириш қўмитаси» сўзлари билан алмаштирилсин;

в) 3-банд қуйидаги таҳрирда баён этилсин:

«3. Ветеринария ва чорвачиликни ривожлантириш қўмитаси эпизоотик осойишталикни таъминлаш, ҳайвонларнинг юқумли касалликларини ўз вақтида аниқлаш, ташхис қўйиш ва тарқалишининг олдини олиш, чорвачиликни барча тармоқларини ва наслчиликни ривожлантириш учун масъул республика ижро этувчи ҳокимият органи ҳисобланади».

г) 4-банднинг иккинчи, учинчи ва тўртинчи хатбошиларида ҳамда 5-банднинг биринчи хатбошисидаги «Ўзбекистон Республикаси Ветеринария ва чорвачиликни ривожлантириш давлат қўмитаси» сўзлари «Ветеринария ва чорвачиликни ривожлантириш қўмитаси» сўзлари билан алмаштирилсин;

д) 6 ва 7-бандлар ўз кучини йўқотган деб ҳисоблансин.

2. Ўзбекистон Республикаси Президентининг 2020 йил 2 сентябрдаги «Ўзбекистон Республикасида пиллачилик ва қоракўлчиликни янада ривожлантириш чора-тадбирлари тўғрисида»ги ПФ-6059-сон Фармонида:

а) 4-банддаги «Ипакчилик ва жун саноатини ривожлантириш қўмитасига» сўзлари «Қишлоқ хўжалиги вазирлиги ҳузуридаги Ипакчилик ва жун саноатини ривожлантириш қўмитасига» сўзлари билан алмаштирилсин;

б) 5-бандда:

иккинчи хатбошидаги «Ипакчилик ва жун саноатини ривожлантириш қўмитаси» сўзлари «Қишлоқ хўжалиги вазирлиги ҳузуридаги Ипакчилик ва жун саноатини ривожлантириш қўмитаси» сўзлари билан алмаштирилсин;

учинчи хатбоши қуйидаги таҳрирда баён этилсин:

«пиллачилик ва қоракўлчилик соҳасини ривожлантиришни таъминлаш»;

в) 10-банднинг биринчи хатбошиси қуйидаги таҳрирда баён этилсин:

«10. Қишлоқ хўжалиги вазирлиги:»;

г) 2-илованинг номи қуйидаги таҳрирда баён этилсин:

«Қишлоқ хўжалиги вазирлиги ҳузуридаги Ипакчилик ва жун саноатини ривожлантириш қўмитасига доимий фойдаланиш ҳуқуқи асосида тегишли бўлган яйловларда 2021–2025 йилларга мўлжалланган Ўзбекистон Республикасида қоракўлчиликни ривожлантиришнинг
МАҚСАДЛИ ПАРАМЕТРЛАРИ».

3. Ўзбекистон Республикаси Президентининг 2017 йил 1 июндаги «Ўзбекистон Республикаси Давлат ветеринария қўмитаси фаолиятини ташкил этиш чора-тадбирлари тўғрисида»ги ПҚ-3026-сон қарори 8-бандининг иккинчи хатбошисидаги «Ветеринария ва чорвачиликни ривожлантириш давлат қўмитасининг» сўзлари «Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитасининг» сўзлари билан алмаштирилсин.

4. Ўзбекистон Республикаси Президентининг 2018 йил 26 апрелдаги «Фермер, деҳқон хўжаликлари ва томорқа ер эгалари фаолиятини такомиллаштириш бўйича қўшимча чора-тадбирлар тўғрисида»ги ПҚ-3680-сон қарорининг 11-банди қуйидаги таҳрирда баён этилсин:

«11. Белгилансинки, Жамғарманинг ижро этувчи аппарати, жумладан марказий аппарати ва ҳудудий вакиллар штат бирликлари миқдори Жамғарма Васийлик кенгаши томонидан белгиланади. Бунда Жамғарма иш ҳажмидан келиб чиқиб, Васийлик кенгашига Жамғармага қўшимча штат бирликлари жалб этиш ҳуқуқи берилсин».

5. Ўзбекистон Республикаси Президентининг 2018 йил 8 майдаги «Самарқанд ветеринария медицинаси институтини ташкил этиш тўғрисида»ги ПҚ-3703-сон қарори 2-бандининг тўққизинчи хатбошисида ва 4-бандда «Ветеринария ва чорвачиликни ривожлантириш давлат қўмитаси» сўзлари «Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси» сўзлари билан алмаштирилсин.

6. Ўзбекистон Республикаси Президентининг 2018 йил 13 ноябрдаги «Паррандачиликни янада ривожлантириш бўйича қўшимча чора-тадбирлар тўғрисида»ги ПҚ-4015-сон қарори ­14-бандининг учинчи хатбошиси ва 23-банддаги «Ветеринария ва чорвачиликни ривожлантириш давлат қўмитаси» сўзлари «Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси» сўзлари билан алмаштирилсин.

7. Ўзбекистон Республикаси Президентининг 2019 йил 20 мартдаги «Ўзбекистон Республикасида боғдорчилик ва иссиқхона хўжалигини янада ривожлантириш чора-тадбирлари тўғрисида»ги ПҚ-4246-сон қарорида:

а) 2-банднинг биринчи хатбошисида «Боғдорчилик ва иссиқхона хўжалигини ривожлантириш агентлигининг» сўзлари «Қишлоқ хўжалигида хизматлар кўрсатиш агентлигининг» сўзлари билан алмаштирилсин;

б) 3 ва 5-бандлар ҳамда қарорга илова ўз кучини йўқотган деб ҳисоблансин.

8. Ўзбекистон Республикаси Президентининг 2019 йил 28 мартдаги «Ўзбекистон Республикаси Ветеринария ва чорвачиликни ривожлантириш давлат қўмитаси фаолиятини ташкил этиш тўғрисида»ги ПҚ-4254-сон қарорида:

а) 1-бандда:

иккинчи–ўн иккинчи хатбошилар чиқариб ташлансин;

ўн учинчи–ўн тўққизинчи хатбошилар тегишинча иккинчи–саккизинчи хатбошилар деб ҳисоблансин;

б) 2-бандда:

биринчи хатбошидаги «Ветеринария ва чорвачиликни ривожлантириш давлат қўмитаси» сўзлари «Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси» сўзлари билан алмаштирилсин;

иккинчи хатбошидаги рус тилидаги матнда «Государственного комитета» сўзлари «Комитета» сўзлари билан алмаштирилсин;

в) 3-бандда:

иккинчи–олтинчи хатбошилар чиқариб ташлансин;

еттинчи–ўн бешинчи хатбошилар тегишинча иккинчи–ўнинчи хатбошилар деб ҳисоблансин;

бешинчи хатбошидаги «Ветеринария ва чорвачиликни ривожлантириш давлат қўмитасининг» сўзлари тегишинча «Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитасининг» сўзлари билан алмаштирилсин;

г) 4, 5 ва 8-бандлар ўз кучини йўқотган деб ҳисоблансин;

д) 9-банддаги «Агентликнинг бош директори, Қорақалпоғистон Республикаси ва вилоятлар «Чорванасл» марказлари директорларига» сўзлари «Ўзбекистон Республикаси Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси раисига, Қорақалпоғистон Республикаси Ветеринария ва чорвачиликни ривожлантириш қўмитаси раисига ҳамда вилоятлар ва Тошкент шаҳар ветеринария ва чорвачиликни ривожлантириш бошқармаларининг бошлиқларига» сўзлари билан алмаштирилсин;

е) 10-банддаги «Агентлик ва унинг ҳудудий бўлинмалари» сўзлари «Ўзбекистон Республикаси Ветеринария ва чорвачиликни ривожлантириш қўмитаси, Қорақалпоғистон Республикаси Ветеринария ва чорвачиликни ривожлантириш қўмитаси ҳамда вилоятлар ва Тошкент шаҳар ветеринария ва чорвачиликни ривожлантириш бошқармалари» сўзлари билан алмаштирилсин;

ж) 13-банддаги «Ветеринария ва чорвачиликни ривожлантириш давлат қўмитаси ҳамда Агентлик» сўзлари «Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси» сўзлари билан алмаштирилсин;

з) 14-банддаги «Агентлик» сўзи «Ўзбекистон Республикаси Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси» сўзлари билан алмаштирилсин;

и) 16-банддаги «Ветеринария ва чорвачиликни ривожлантириш давлат қўмитаси, Агентлик» сўзлари «Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси» сўзлари билан алмаштирилсин;

к) 18-банддаги «Агентлик бош директори» сўзлари «Ўзбекистон Республикаси Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси раиси» сўзлари билан алмаштирилсин;

л) 1–13-иловалар ўз кучини йўқотган деб топилсин.

9. Ўзбекистон Республикаси Президентининг 2017 йил 16 сентябрдаги «Халқаро тикланиш ва тараққиёт банки ҳамда Халқаро тараққиёт ассоциацияси иштирокида «Ўзбекистон Республикасида Чорвачилик секторини ривожлантириш» лойиҳасини амалга ошириш чора-тадбирлари тўғрисида»ги ПҚ-3283-сон қарори 2-банднинг учинчи хатбошисидаги ва 6-банднинг учинчи хатбошисидаги «Ветеринария ва чорвачиликни ривожлантириш давлат қўмитаси» сўзлари «Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси» сўзлари билан алмаштирилсин.

10. Ўзбекистон Республикаси Президентининг 2019 йил 7 ноябрдаги «Қорақалпоғистон Республикасида Чорвачилик тармоқларини жадал ривожлантириш чора-тадбирлари тўғрисида»ги ПҚ-4512-сон қарорида:

а) 5-банднинг иккинчи хатбошиси ва 14-банд «а» кичик бандининг тўртинчи хатбошисидаги «Ветеринария ва чорвачиликни ривожлантириш давлат қўмитаси» сўзлари «Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси» сўзлари билан алмаштирилсин;

б) 17-банддаги «Ветеринария ва чорвачиликни ривожлантириш давлат қўмитаси, Ўзбекистон Республикаси Қишлоқ хўжалиги вазирлиги ҳузуридаги» сўзлари «Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси,» сўзлари билан алмаштирилсин;

в) 1-илованинг учинчи хатбошисидаги «Ветеринария ва чорвачиликни ривожлантириш давлат қўмитаси» сўзлари «Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси» сўзлари билан алмаштирилсин;

г) 2-илованинг 6-позицияси «Масъуллар» устунидаги «Ветеринария ва чорвачиликни ривожлантириш давлат қўмитаси» сўзлари «Ветеринария қўмитаси» сўзлари билан алмаштирилсин.

11. Ўзбекистон Республикаси Президентининг 2019 йил 27 ноябрдаги «Осиё тараққиёт банки иштирокидаги «Чорвачилик соҳасида қўшилган қиймат занжирини яратишни ривожлантириш» лойиҳасини амалга оширишга доир қўшимча чора-тадбирлар тўғрисида»ги ПҚ-4538-сон қарорида:

а) 2-банднинг учинчи хатбошисидаги «Ветеринария ва чорвачиликни ривожлантириш давлат қўмитаси» сўзлари «Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси» сўзлари билан алмаштирилсин;

б) 4-илованинг 12, 12.1, 12.2 ва 13-позициялари «Чора-тадбирларнинг номланиши» устунидаги «Ветеринария ва чорвачиликни ривожлантириш давлат қўмитаси» сўзлари «Ветеринария қўмитаси» сўзлари билан алмаштирилсин.

12. Ўзбекистон Республикаси Президентининг 2020 йил 29 январдаги «Чорвачилик тармоғини давлат томонидан кўллаб-қувватлашнинг қўшимча чора-тадбирлари тўғрисида»ги ПҚ-4576-сон қарорига 1-илованинг 2-бандидаги «Ветеринария ва чорвачиликни ривожлантириш давлат қўмитаси» сўзлари «Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси» сўзлари билан алмаштирилсин.

13. Ўзбекистон Республикаси Президентининг 2020 йил 2 сентябрдаги «Ўзбекистон Республикаси Ипакчилик ва жун саноатини ривожлантириш қўмитаси фаолиятини ташкил этиш тўғрисида» ПҚ-4817-сон қарорида:

а) 1-бандда:

иккинчи–тўртинчи хатбошилар чиқариб ташлансин;

бешинчи хатбоши иккинчи хатбоши деб ҳисоблансин;

б) 2-банд ўз кучини йўқотган деб ҳисоблансин;

в) 1–3-иловалар ўз кучини йўқотган деб ҳисоблансин.

14. Ўзбекистон Республикаси Президентининг 2021 йил 15 декабрдаги «Мева-сабзавотчилик соҳасини давлат томонидан қўллаб-қувватлаш, тармоқда кластер ва кооперация тизимини янада ривожлантириш чора-тадбирлари тўғрисида»ги ПҚ-52-сон қарорида:

а) 8-бандда:

биринчи хатбошидаги «Боғдорчилик ва иссиқхона хўжалигини ривожлантириш агентлигининг» сўзлари «Қишлоқ хўжалигида хизматлар кўрсатиш агентлигининг» сўзлари билан алмаштирилсин;

тўртинчи хатбоши ва 3-илова ўз кучини йўқотган деб ҳисоблансин;

б) 19-банднинг биринчи хатбошисидаги «Боғдорчилик ва иссиқхона хўжалигини ривожлантириш агентлиги» сўзлари «Қишлоқ хўжалигида хизматлар кўрсатиш агентлиги» сўзлари билан алмаштирилсин.

15. Ўзбекистон Республикаси Президентининг 2023 йил 29 мартдаги «Аграр секторни замонавий қишлоқ хўжалиги техникалари билан таъминлашни рағбатлантиришнинг қўшимча чора-тадбирлари тўғрисида»ги ПҚ-103-сон қарори 1-бандининг учинчи хатбошиси «рўйхат бўйича хориждан олиб келинадиган» сўзларидан кейин «ишлаб чиқарилганига 3 йилдан ошмаган» сўзлари билан тўлдирилсин.

16. Вазирлар Маҳкамасининг 2018 йил 7 июндаги «Ўзбекистон фермер, деҳқон хўжаликлари ва томорқа ер эгалари кенгаши ҳузуридаги Фермер, деҳқон хўжаликлари ва томорқа ер эгаларини қўллаб-қувватлаш жамғармаси фаолиятини ташкил этиш тўғрисида»ги 433-сон қарорида:

а) 1-илова қуйидаги таҳрирда баён этилсин:

«ЎзР ВМнинг 2018 йил 7 июндаги 433-сон қарорига
1-ИЛОВА

Ўзбекистон фермер, деҳқон хўжаликлари ва томорқа ер эгалари кенгаши ҳузуридаги Фермер,
деҳқон хўжаликлари ва томорқа ер эгаларини қўллаб-қувватлаш жамғармаси Васийлик кенгашининг

ТАРКИБИ

Изоҳ. Васийлик кенгаши аъзолари бошқа ишга ўтган тақдирда, собиқ аъзоларнинг вазифалари ушбу лавозимларга янгидан тайинланган шахслар зиммасига юкланади»;

б) 3-иловада:

7-банднинг еттинчи хатбошисидаги «Молия вазирлигига» сўзлари «Иқтисодиёт ва молия вазирлигига» сўзлари билан алмаштирилсин;

15-банддан учинчи хатбоши чиқариб ташлансин;

17-бандда:

қуйидаги мазмундаги саккизинчи хатбоши билан тўлдирилсин:

«қишлоқ хўжалиги ва томорқа хизмати корхоналари, фермер, деҳқон хўжаликлари ва томорқа ер эгаларига қуритиш цехи ва совуткичли омборхоналарни харид қилиш ва ўрнатишга 36 ойгача имтиёзли давр билан 84 ой муддатга йиллик 14 фоиз ставкада ажратилади. Бунда, кредит 60 фоизининг гаров таъминоти сифатида ўрнатиладиган қуритиш цехи ва совуткичли омборхоналар олинади, 40 фоизининг гаров таъминоти сифатида уларни қайтмаслик хатарини суғурта қилиш бўйича суғурта полиси олинади, шунингдек, кредит суммаси ташаббускорларга қуритиш цехи ва совуткичли омборхоналар ўрнатиб берилгандан сўнг маҳсулот етказиб берувчининг ҳисобрақамига ўтказиб берилади»;

саккизинчи–йигирма бешинчи хатбошилар тўққизинчи–йигирма олтинчи хатбошилар деб ҳисоблансин.

17. Вазирлар Маҳкамасининг 2021 йил 4 июндаги 352-сон қарори билан тасдиқланган Ўзбекистон Республикаси ҳудудига импорт қилишда божхона божи ва қўшилган қиймат солиғидан озод этиладиган, ўхшаши республикада ишлаб чиқарилмайдиган технологик асбоб-ускуналар рўйхатида:

а) қуйидаги мазмундаги 142¹-позиция билан тўлдирилсин:

*Ушбу Фармон Қонун ҳужжатлари маълумотлари миллий базасида (lex.uz) эълон қилинган ва 12.06.2023 йилдан кучга кирди.

**Ушбу Фармонга 1–8-иловалар «Норма маслаҳатчи»да берилмайди. Ҳужжатнинг тўлиқ матни билан «Norma» АҚТ ва nrm.uz сайтида танишиш мумкин.