Бутун дунёда, шу жумладан Россияда рақамлаштириш таомиллари амалга оширилаётганига қарамай, кўпчилик корхоналар хатар даражаси юқори бўлган шароитда ишлашда давом этяпти. Бугунги кунда қуйидаги тармоқлар жароҳат олиш даражаси юқори бўлганлар деб ҳисобланади: қурилиш, қайта ишлаш соҳаси, фойдали қазилмаларни кавлаб олиш, қишлоқ ва ўрмон хўжаликлари, балиқчилик ва транспорт соҳаси. Афсуски, бундай корхоналарда ишлаб чиқаришда шикастланиш ҳолатлари учраб турибди.
Россия Федерацияси Ижтимоий суғурта жамғармасининг расмий маълумотларига кўра, сўнгги йилларда ишлаб чиқаришдаги суғурта ҳолатлари сони 2 мартага камайган.
Меҳнат мажбуриятларини бажаришда шикастланган ёки касб касаллигига чалинган фуқаролар бир бутун ижтимоий қўллаб-қувватлашга доир чора-тадбирлар комплексини олишга ҳақлидир. Булар бир марталик ва ҳар ойлик суғурта тўловлари, касаллик варақалари бўйича тўланадиган тўлов, тиббий, ижтимоий ва профессионал реабилитацияга оид қуйидаги қўшимча харажатларни қоплаш учун тўлов: ишлаб чиқаришдаги оғир жароҳат етказган бахтсиз ҳодисадан кейин бевосита тиббий ёрдам олиш харажатлари, дори воситалари ва тиббий буюмларни харид қилиш харажатлари, четдан (махсус тиббий ва маиший) парвариш олиш харажатлари, санаторий-курортда даволаниш, реабилитация техник воситаси, протез-ортопедия буюмлари, транспорт воситалари, капитал, жорий таъмирлаш ҳамда ёқилғи-мойлаш материаллари, касбга ўқитиш ва қўшимча касб бўйича билимларни эгаллашга оид харажатлар.
Ишлаб чиқаришдаги бахтсиз ҳодиса оқибатида шикастланган ёки касб касаллигига чалинган шахс тиббий, ижтимоий ва профессионал реабилитацияга қўшимча харажатлар тўланиши учун Тиббий-ижтимоий экспертиза бюросига мурожаат қилиши лозим, у ерда ишлаб чиқаришдаги бахтсиз ҳодиса оқибатида шикастланган ёки касб касаллигига чалинган шахсни реабилитация қилиш дастури ишлаб чиқилади ва унда турмуш тарзи ва меҳнат фаолиятини ҳисобга олган ҳолда шикастланган шахсни реабилитация қилиш учун қандай реабилитация чоралари зарурлиги кўрсатилади. Ушбу кўрсатмалар асосида шахс шикастланиш юзасидан шахсий ҳужжатлари турган (ҳисобга олинган) РФ Ижтимоий суғурта жамғармасининг ҳудудий бўлинмасига ариза билан мурожаат қилади.
Меҳнат стажидан қатъи назар, шикастланган шахсга касаллик варақаси бўйича ўртача ойлик иш ҳақининг 100%и миқдорида тўлов тўланади. Корхона ходими меҳнат вазифаларини бажараётганда вафот этган бўлса, оиласига Жамғарма томонидан 1 млн рубль миқдорида бир марталик тўлов тўланади. Агар шахс оғир жароҳат олган бўлса, соғлиқ йўқотилганлиги фоизидан келиб чиққан ҳолда Жамғарма маблағларидан ҳисобланадиган бирйўла суғурта тўлови тўланади. Соғлиқ тўлиқ йўқотилганда тўлов 103 527,66 рубль миқдорида бўлади. Шунингдек шикастланган шахс соғлиғини тўлиқ тиклагунига қадар ҳар ойда суғурта тўловини олишга ҳақли бўлади. Агар шифо топмаса, умрбод суғурта тўлови тўланади.
Шуни таъкидлаш жоизки, ишлаб чиқаришдаги бахтсиз ҳодиса оқибатида шикастланган ёки касб касаллигига чалинган шахс билан хабарлашиш қулай бўлиши учун шахсий ахборот навигатори мавжуд.
Жамғарма мутахассислари томонидан ишлаб чиқаришда шикастланган шахсга юбориладиган шахсий режада унга реабилитация дастури бўйича белгиланган реабилитация техник воситалари турлари, уларнинг сони, ушбу воситалар билан таъминлаш ёки фойдаланиш муддати тугаганидан кейин алмаштириш муддатлари, шунингдек ҳудудий бўлинма масъул ходими билан алоқа боғлаш учун маълумотлар кўрсатилади. Бундай режани олган шахс Ижтимоий суғурта жамғармаси билан хабарлашишнинг қуйидаги усулларидан ўзига қулай бўлганини танлайди: СМС-хабар, электрон почта, телефон ёки почта алоқаси орқали. Айнан танланган вариант бўйича кейинги қўйиладиган қадамлар ҳақида унга хабар берилади.