Оилавий меҳмонхонамиз бор.
Келажакда яхши пенсия олиш учун Пенсия жамғармасига қандай бадалларни тўлаш лозим?
– Оилавий меҳмон уйлари якка тартибдаги тадбиркор сифатида фаолият юритади. Тегишинча, улар якка тартибдаги тадбиркор сифатида бир ойда БҲМнинг 1 бараваридан кам бўлмаган миқдорда ижтимоий солиқ тўлайдилар (СК 408-м. 1-қ.).
Келажакда яхши пенсия олиш учун сиз тўланадиган ижтимоий солиқ миқдорини оширишингиз лозим, буни пенсияга чиқишингизга 5 йил қолганда амалга оширганингиз мақбул бўлади.
Масалан, 2021 йил апрелда 245 000 сўм миқдорида ижтимоий солиқ тўладингиз. Тегишинча, 2021 йил апрель ойи учун даромад миқдори 2 041 666,67 сўмни (245 000 / 12 х 100, бунда 12% – микрофирмалар ва кичик корхоналар, шунингдек фермер хўжаликлари учун ижтимоий солиқ ставкаси) ташкил этади.
Сиз тўланадиган ижтимоий солиқ миқдорини ошириш орқали пенсия ҳисоблаш учун қабул қилинадиган иш ҳақи миқдорини оширишингиз мумкин. 350 000 сўм миқдорида ижтимоий солиқ тўлайдиган бўлсангиз, ойлик даромад миқдори 2 916 666,67 сўмни (350 000 / 12 х 100) ташкил этади.
Маълумот учун!
ПЕНСИЯНИ ҲИСОБ-КИТОБ ҚИЛИШ УЧУН пенсияни ҳисоблаш базавий миқдорининг 10 бараваридан ОРТИҚ БЎЛМАГАН миқдордаги ўртача ойлик иш ҳақи ёки 2 624 700 сўм олинади («Фуқароларнинг давлат пенсия таъминоти тўғрисида»ги Қонуннинг 31-м. 6-қ.).
