Шахс Самарқандда прописка қилинган ва пенсияси картага ўтказилади. Ангренга кўчиб ўтди. Онлайн прописка қилинди. Пенсиясини қандай ўтказиш мумкин?
– Ҳозирча Пенсия жамғармаси тизимида бошқа манзилга кўчиб ўтганлиги муносабати билан янги яшаш жойи бўйича онлайн-рўйхатга олиш тизими мавжуд эмас. Сиз янги яшаш жойингиз бўйича Пенсия жамғармасининг бўлимига ариза ва паспорт нусхаси ҳамда янги яшаш жойи бўйича рўйхатга олиш тўғрисидаги ҳужжат билан мурожаат қилишингиз лозим. Мазкур бўлим аввалги яшаш жойингиздан пенсия йиғмажилдини сўраган ҳолда кўмак кўрсатади (Низомнинг 170-б., ВМнинг 8.09.2011 йилдаги 252-сон қарорига 1-илова).
Ушбу ҳолатда пенсияни тўлаш пенсия ҳужжатлар йиғмажилди олингандан кейин пенсия олувчи шахснинг янги яшаш жойи бўйича Пенсия жамғармаси бўлими томонидан давом эттирилади. Бунда пенсияни тўлаш унинг олдинги яшаш жойи бўйича пенсияни тўлаш тўхтатилган вақтдан бошлаб, бироқ у ҳисобга қўйиш мақсадида мурожаат этганидан олдинги 12 ойдан ошмаган давр учун давом эттирилади.
Пенсияни картага олиш тўғрисидаги масала юзасидан янги яшаш жойингиздаги илгари карта берилган банк филиалига мурожаат қилишингиз керак.