Жорий йил 8 апрель куни Ўзбекистон Республикаси Президенти ҳузурида ўтказилган видеоселектор йиғилишида ҳудудларда тадбиркорликни ривожлантириш тўғрисида берилган топшириқлардан келиб чиқиб, Сирдарё вилояти божхона бошқармасида ташкил этилган Ишчи гуруҳ тадбиркорларнинг муаммоларини яқиндан ўрганди ва қисқа муддатда бартараф этилишида кўмаклашди.
Учрашув Янгиер шаҳридаги эркин иқтисодий зонасида жойлашган «ELEGANT FIBER TEXTILE», «INTERGRAIN» ва «SIRDARYO ELTEXSANOAT GROUP» МЧЖларнинг мутасадди раҳбарлари иштирокида «мижозбай» тизимида ўтказилди.
Мазкур учрашувда божхона соҳасига оид қонунбузилиш ҳолатларини таҳлилий ўрганиб чиқиш ва уларнинг келиб чиқиш сабабларини бартараф этиш, божхона органлари билан вужудга келиши мумкин бўлган низоларни муқобил ҳал этиш муҳокама қилинди. Тадбиркорликни қўллаб-қувватлашда берилаётган кенг имкониятларга алоҳида тўхталиб ўтилди.
Шунингдек, масъул ходимлар 2020–2021 йилларда аниқланган божхона соҳасига оид қонунбузилиш ҳолатларига тўхталиб, бу йўналишда тадбиркорлик субъектлари ўртасида вужудга келаётган низоли ҳолатларни муқобил ҳал этишга алоҳида эътибор қаратди, тадбиркорларга асосланган ҳуқуқий маслаҳатлар берилди.
Учрашувдан сўнг иштирокчилар корхонанинг тикув цехида бўлиб, трикотаж маҳсулотларини ишлаб чиқариш жараёни билан яқиндан танишишди.
ЎзА асосида.