АЖ жамиятни қайта ташкил этаяпти.
У акцияларини сотиш истагини билдирган акциядорларидан акцияларни сотиб олиши лозимми?
– Овоз берувчи акцияларнинг эгалари бўлган акциядорлар акциядорларнинг умумий йиғилиши томонидан жамиятни қайта ташкил этиш тўғрисида қарор қабул қилинишига қарши овоз берган бўлсалар ёхуд бу масалалар бўйича овоз беришда узрли сабабларга кўра иштирок этмаган бўлсалар, ўзларига қарашли акцияларнинг ҳаммаси ёки муайян қисми қайтариб сотиб олинишини талаб қилишга ҳақлидир. Ўзларига тегишли акцияларни жамиятнинг қайтариб сотиб олишини талаб қилиш ҳуқуқига эга бўлган акциядорлар рўйхати овоз бериш натижасида акцияларни қайтариб сотиб олишни талаб қилиш ҳуқуқи вужудга келиши мумкин бўлган масалалар кун тартибига киритилган умумий йиғилишда қатнашиш ҳуқуқига эга бўлган жамият акциядорлари реестрининг маълумотлари асосида тузилади («Акциядорлик жамиятлари ва акциядорларнинг ҳуқуқларини ҳимоя қилиш тўғрисида»ги Қонуннинг 40-м.).
Жамият акциядорларни ўзларига тегишли акцияларни жамият қайтариб сотиб олишини талаб қилиш ҳуқуқи борлигидан, қайтариб сотиб олиш баҳоси ва уни амалга ошириш тартибидан хабардор этиши шарт. Акциядорнинг ўзига тегишли акцияларни жамият қайтариб сотиб олиши тўғрисидаги ёзма талабномаси акциядорларнинг умумий йиғилиши томонидан тегишли қарор қабул қилинган кундан эътиборан 30 кундан кечиктирмасдан жамиятга юборилиши лозим. Унда қуйидаги маълумотлар кўрсатилади:
● акциядорнинг яшаш манзили (жойлашган манзили);
● акциядор қайтариб сотиб олинишини талаб қилаётган акциялар сони.
Кўрсатиб ўтилган муддат тугаганидан сўнг жамият қайтариб сотиб олиш талабини қўйган акциядорлардан акцияларни 10 кун ичида сотиб олиши шарт.
Жамият қайта ташкил этилган тақдирда у қайтариб сотиб олган акциялар уларни қайтариб сотиб олиш чоғида муомаладан чиқарилади (Қонуннинг 41-м.).
Икром Абдулқодиров,
«Norma» МЧЖ эксперти.