Ҳамшира ҳайдовчиларда мастлик ҳолати мавжуд ёки мавжуд эмаслигини текшириш учун корхона ҳисобидан ўқитилди. Сертификат олди. Айни пайтда у ҳайдовчиларни мастлик ҳолати юзасидан текшириш унинг лавозим йўриқномасида қайд этилмаганлиги сабабли қўшимча тўлов тўланишини талаб қиляпти.
Корхона ўриндошлик бўйича қўшимча тўлов тўлаши лозимми ёки ҳамширанинг иш ҳақини ошириши керакми?
– Ушбу вазият ички ўриндошлик бўла олмайди. Вақтинча ишда бўлмаган ёки бўш лавозим бўйича мажбуриятлар бажарилиши ички ўриндошлик бўлиши мумкин.
Мазкур ҳолатда иш ҳажмининг оширилиши ҳақида сўз бормоқда, бунинг учун тўланадиган ҳақ миқдори иш берувчи ва ходим ўртасида тузиладиган битимда белгиланади (МК 160-м.; ВМнинг 18.10.2012 йилдаги 297-сон қарори билан тасдиқланган Низомнинг 20-б.). Қоидага кўра, ходимга лавозим маоши билан бирга келишилган суммадаги қўшимча тўлов тўланади.
Лавозим йўриқномасига ўзгартиришлар киритиладиган бўлса, яъни унда янги мажбуриятлар ғайд этилса, қўшимча мажбуриятларни ҳисобга олган ҳолда иш ҳақи миқдорини ошириш мақсадга мувофиқ бўлади.
