Компаниямиз пенополиуретандан тайёрланган иситкичли сэндвич-панелларни (полиуретан компонентларининг ТИФ ТН коди – 3909 50 900 0) ишлаб чиқариш билан шуғулланади. Божхона тўловларини тўлашдан озод қилинган олиб кирилаётган товарлар рўйхатида у қайд этилган, бироқ «Пойабзал ва уни ишлаб чиқариш учун материаллар, чарм галантерея, шу жумладан чарм кийимлар ишлаб чиқариш учун» бўлимида қайд этилган. Агар биз худди шу кодга эга хом ашёни бошқа мақсадларни кўзлаб олиб кирсак, унга имтиёз татбиқ этиладими ёки йўқми?
Е.Л.
Давлат божхона қўмитаси мурожаатни кўриб чиқиб, қуйидагиларни маълум қилди.
Ўзбекистон Республикаси Президентининг 28.01.2009 йилдаги ПҚ-1050-сон Қарорининг* 3-бандига мувофиқ, 2018 йил 1 январгача бўлган даврда ноозиқ-овқат истеъмол товарлари ишлаб чиқаришга ихтисослашган корхоналар импорт қилинадиган асбоб-ускуналар, бутловчи буюмлар, ЎзР Вазирлар Маҳкамасининг 4.09.2012 йилдаги 585-ф-сон фармойиши билан тасдиқланган рўйхатга кўра ноозиқ-овқат истеъмол товарларини ишлаб чиқаришда фойдаланиладиган, республикада ишлаб чиқарилмайдиган хом ашё ва материаллар учун божхона тўловларини (божхона расмийлаштируви учун йиғимдан ташқари) тўлашдан озод қилинганлар.
Мазкур фармойишга 2-иловадаги товарлар рўйхати ишлаб чиқариладиган ноозиқ-овқат истеъмол товарлари ихтисослашувидан келиб чиқиб, бўлимлар бўйича ажратилган.
Ўзбекистон Республикаси ҳудудига олиб кириладиган ва «Пойабзал ва уни ишлаб чиқариш учун материаллар, чарм галантерея, шу жумладан чарм кийимлар ишлаб чиқариш учун» бўлимига киритилган товарлар ЎзР Президентининг 28.01.2009 йилдаги ПҚ-1050-сон Қарорига мувофиқ, пойабзал ва уни ишлаб чиқариш учун материаллар, чарм галантерея, шу жумладан чарм кийимлар ишлаб чиқаришга ихтисослашган корхона томонидан импорт қилинаётган бўлсагина божхона тўловларини тўлашдан озод этилади.
Мурожаатингизга берилган жавобга қўшилмаган тақдирда Ўзбекистон Республикаси қонун ҳужжатлари билан белгиланган тартибда юқори турувчи инстанцияларга ёки суд органларига мурожаат этишга ҳақлисиз.
*«Маҳаллий ноозиқ-овқат истеъмол товарлари ишлаб чиқариш кенгайтирилишини рағбатлантириш борасидаги қўшимча чора-тадбирлар тўғрисида».
Муталибжон СОЛИЕВ, ЎзР Давлат божхона қўмитаси раисининг ўринбосари.