Давлат божхона қўмитаси Олий ҳарбий божхона институтида «Коррупцияга қарши курашиш ва унинг олдини олиш устувор вазифа» мавзуида илмий-амалий семинар бўлиб ўтди.
Тадбирда Ўзбекистон Республикаси Бош прокуратураси, Миллий хавфсизлик хизмати институти, Ички ишлар вазирлиги академияси, божхона хизмати масъул ходимлари, профессор-ўқитувчилар иштирок этди.
ДБҚ раисининг биринчи ўринбосари Б.Раимов, Олий ҳарбий божхона институти бошлиғи С.Абдухалилов, Бош прокуратуранинг жиноятчилик ва коррупцияга қарши курашиш бошқармаси катта прокурори Ў.Маматқулов ва бошқалар Президентимиз Ислом Каримов раҳнамолигида мамлакатимизда қонун устуворлиги таъминланаётгани коррупция йўлига тўсиқ бўлаётганини таъкидлади.
Мамлакатимизда коррупциянинг олдини олиш ва унга қарши курашиш бўйича мустаҳкам ҳуқуқий база яратилган. Ўзбекистон 2008 йилда Бирлашган Миллатлар Ташкилотининг «Коррупцияга қарши» конвенциясини ратификация қилган. 2010 йилда Коррупцияга қарши курашиш бўйича Истанбул ҳаракат режасига қўшилган.
Ўзбекистон Республикасининг «Парламент назорати тўғрисида»ги Қонуни (11.04.2016 йилдаги ЎРҚ-403-сон) асосида парламент томонидан давлат ҳокимияти ва бошқаруви органларида назорат амалга оширилиши ҳуқуқий жиҳатдан мустаҳкамланди.
Вазирлар Маҳкамасининг 2015 йил 21 майда тасдиқланган Коррупцияга қарши курашиш бўйича амалга ошириладиган комплекс чора-тадбирлар режаси асосида барча давлат органларида, жумладан, божхона органларида амалий тадбирлар ўтказилмоқда.
Семинарда коррупцияга қарши курашиш дунё миқёсида глобал муаммолардан бирига айланганига эътибор қаратилди. Коррупцияга қарши курашиш ва унинг олдини олиш, мансабдор шахслар, хизматчилар, ҳокимият вакиллари томонидан содир этилган ҳуқуқбузарликлар учун маъмурий жавобгарлик, божхона органларида коррупция ва бошқа қонунбузарликларни бартараф этиш масалаларига оид маърузалар тингланди.
ЎзА материали асосида.
