Ташкилотимиз фаолиятни божхона брокери сифатида амалга оширади. Божхона юк декларациясини тўлдириш тартиби тўғрисидаги йўриқноманинг 1.10-бандига қўшимча киритилган: «Олиб келинадиган, ўз эҳтиёжлари учун мўлжалланмаган ва ТИФ ТНнинг биргина коди билан таснифланадиган, бироқ турли номлар, товар белгилари, русумлар, моделлар ва техник тавсифларга эга бўлган истеъмол товарлари қўшимча варақлардан фойдаланган ҳолда турли товарлар сифатида декларацияланади». Ўз эҳтиёжлари учун мўлжалланган ва ТИФ ТНнинг биргина коди билан таснифланадиган, бироқ турли номлар, товар белгилари, русумлар, моделлар ва техник таснифларга эга бўлган ноистеъмол товарларини қўшимча варақлардан фойдаланган ҳолда турли товарлар сифатида декларациялаш мумкинми?
– Сиз кўрсатган қўшимча1 Божхона юк декларациясини тўлдириш тартиби тўғрисидаги йўриқноманинг2 (бундан кейин – Йўриқнома) 1.10-бандига олиб келинадиган, ўз эҳтиёжлари учун мўлжалланмаган ва ТИФ ТНнинг биргина коди билан таснифланадиган, бироқ турли номлар, русумлар, брендлар, моделлар ва техник тавсифларга эга бўлган истеъмол товарларини расмийлаштириш тартибини аниқлаштириш, шунингдек 1.8, 1.9, 1.10-бандлар талабларини янада кенг тушунтириш учун киритилган.
Чунончи, Йўриқноманинг 1.8-бандида назарда тутилишича, фақат БЮДнинг асосий варағидан фойдаланган ҳолда товарлар декларацияланганда юк декларациясида бир мамлакатдан келиб чиққан ёки келиб чиқиш мамлакати номаълум бўлган ва, ДБҚнинг меъёрий ҳужжатларида бошқа қоида назарда тутилмаган бўлса, бир хил божхона тўловлари солинадиган, Ташқи иқтисодий фаолиятнинг товар номенклатурасига мувофиқ биргина 10 белгили код билан таснифланадиган бир ном, тур ва русумдаги товарлар тўғрисидаги маълумотлар эълон қилиниши мумкин.
Йўриқноманинг 1.9-бандида белгиланишича, бир неча номдаги товарлар декларация қилинганда БЮДнинг ажралмас қисми ҳисобланган қўшимча варақлардан (ТД-2 шакли) фойдаланиш керак. Бунда битта қўшимча варақда ҳар бири ТИФ ТНга мувофиқ битта 10 белгили код билан таснифланадиган ва бир мамлакатдан келиб чиқадиган ёки келиб чиқиш мамлакати номаълум бўлган ва, ДБҚнинг меъёрий ҳужжатларида бошқа қоида назарда тутилмаган бўлса, бир хил божхона тўловлари солинадиган, БЮДда декларация қилинадиган 3 ном, тур ва русумдаги товарлар тўғрисидаги маълумотлар эълон қилиниши мумкин.
Сизни қизиқтираётган, ўз эҳтиёжлари учун мўлжалланган ва ТИФ ТНнинг биргина коди билан таснифланадиган ноистеъмол товарлари турли ном, тур ва русумга эгалиги сабабли уларни Йўриқноманинг 1.10-бандининг иккинчи хатбошисига мувофиқ, яъни қўшимча варақлардан фойдаланган ҳолда турли товарлар сифатида декларациялаш зарур.
1ДБҚнинг АВ томонидан 25.01.2012 йилда 834-21-сон билан рўйхатдан ўтказилган қарори билан киритилган.
2ДБҚ томонидан тасдиқланган, АВ томонидан 3.11.1999 йилда 834-сон билан рўйхатдан ўтказилган.
«Божхона» бўлимини махсус мухбиримиз Гулнора АБДУНАЗАРОВА олиб боради.
