Божхона воситачилигининг яширин томони
Профессионал бирлашмалар йиғилишларида, одатда, шаффофлик, рақамлаштириш ва бизнеснинг давлат билан ҳамкорлиги ҳақида кўп гапирилади. Аммо Ўзбекистон божхона брокерлари уюшмаси раиси Арсен АЙРАПЕТЬЯНЦнинг март ойида Марказий Осиё божхона брокерлари уюшмалари раҳбарлари минтақавий кенгашининг Олмаотадаги учрашувидаги нутқи одатдаги расмий чиқишлардан кўра қизиқарлироқ бўлди. У тармоқнинг ташқи кўриниши ҳақида эмас, балки унинг энг оғриқли қисми – божхона брокерлик хизматларининг яширин бозори ҳақида гапирди. Бу чиқишда биргина носоғлом рақобат ҳақида сўз очилгани йўқ. Аслида, Айрапетьянц анча кенгроқ доирани таклиф қилди: яширин воситачи нафақат мижозни йўқотиб қўядиган қонуний брокер учун хавфли. У ТИФ иштирокчисининг ўзи учун, давлат учун, божхона назорати сифати учун ва энг муҳими, рақамли божхонанинг бутун моҳияти учун хавфлидир.