2019 йил апрелда кадрлар бўлими ходимнинг 2018 йил декабрь ойидаги иш вақтини ҳисобга олиш табелини бухгалтерияга топширди. У тузилаётганда ушбу ходимни киритишни унутганлар.
Ходимнинг 2018 йил декабрь ойидаги иш ҳақидан ЖШДС ва бошқа мажбурий ушланмалар, ушбу ходимга иш ҳақи 2019 йил апрелда ҳисобланган бўлса, қайси (2018 ёки 2019) йилги ставкалар бўйича ушланади?
– 2018 йил декабрь ойи учун иш ҳақи ҳисобланиши боис 2018 йил учун тасдиқланган ставкалар бўйича ходимнинг иш ҳақидан ЖШДС, ШЖБПҲга ажратмалар, бюджетдан ташқари ПЖга мажбурий бадаллар ушланиши, шунингдек ЯИТ ҳисобланиши лозим.
Сиз:
● ходимга 2018 йил декабрь ойидаги иш ҳақини ҳисоблаш учун бухгалтерия маълумотномасини тузиб, ўз вақтида ҳисобламаслик сабабларини кўрсатишингиз;
● ЖШДС, ШЖБПҲга ажратмалар, бюджетдан ташқари ПЖга мажбурий бадаллар ва ЯИТни 2018 йил учун тасдиқланган ставкалар бўйича ҳисоблашингиз;
● 2018 йилнинг охирги ҳисобот даври учун ЖШДС, ШЖБПҲга ажратмалар, ЯИТ ва бюджетдан ташқари ПЖга мажбурий бадаллар бўйича ҳисоб-китобларни қайта топширишингиз;
● бухгалтерия ҳисобида хатони жорий даврда тузатишингиз;
● ходимга 2018 йил декабрь ойи учун иш ҳақини тўлашингиз зарур.
Шунингдек корхонанинг локал ҳужжатларида иш ҳақини ҳисоблаш учун ҳужжатларни бухгалтерияга ўз вақтида топширмаганликлари учун кадрлар бўлими ходимларининг жавобгарлигини қайд этишни тавсия этамиз.
Жавобни «Norma» МЧЖ экспертлари тайёрладилар.
