Қурилиш компанияси кўп қаватли уй-жой қурди ва 2017 йилда фойдаланишга топширди. Ҳозирга қадар квартираларнинг ҳаммаси ҳам сотилмаган. 1.01.2019 йилдан 20% ҚҚС ставкаси билан умумбелгиланган солиқларни тўлашга ўтдик. 14.05.2019 йилдан Президентнинг 13.05.2019 йилдаги ПФ-5715-сон Фармонига мувофиқ ҚҚС бўйича имтиёзни қўллашни бошладик. 2019 йил июнда квартиралар таннархидан паст нархда реализация қилинган.
Янги уйдаги квартираларни таннархидан паст нархда реализация қилишдан кўрилган зарарга ҚҚС солинадими?
– 2019 йил 1 январга қадар қурилишга рухсат этилган уй-жой фонди объектларини бирламчи уй-жой бозорида реализация қилиш обороти 2020 йилнинг 1 январига қадар ҚҚСдан озод этилади (13.05.2019 йилдаги ПФ-5715-сон Фармоннинг 13-банди).
Бунда имтиёзнинг амал қилиши исталган, шу жумладан таннархидан паст нархда реализация қилишда ва бепул беришда татбиқ этилади.
ҚҚС бўйича имтиёз мавжуд бўлганда уй-жойнинг реализация қилиш қиймати ва таннархи ўртасидаги фарқ ҚҚС солинадиган объект ҳисобланмайди.
Жавобни «Norma» МЧЖ экспертлари тайёрладилар.