Қайта тикланадиган манбалардан энергия ишлаб чиқариш қурилмаларини ишлаб чиқаришга ихтисослашган, янги ташкил этилган корхоналар учун имтиёздан 5 йил давомида фойдаланган «А» корхонаси янги тузилган «Б» корхонасига қўшилишга қарор қилди.
Ҳуқуқий ворис ҳисобланган «Б» корхонасига «А» корхонаси қўшилганидан кейин имтиёз қўлланадими?
– Йўқ, имтиёз қўлланмайди.
Қайта тикланадиган манбалардан энергия ишлаб чиқариш қурилмаларини ишлаб чиқаришга ихтисослашган, янги ташкил этилган корхоналар давлат рўйхатидан ўтказилган санадан эътиборан 5 йил давомида барча солиқлардан, шунингдек мажбурий ажратмаларни тўлашдан озод этилади (5.05.2015 йилдаги ПҚ-2343-сон қарорнинг 5-банди). 5 йиллик муддат ўтганидан кейин имтиёзларнинг амал қилиши тўхтатилади.
Юридик шахс бошқа юридик шахсга қўшилганида, бу юридик шахсга қўшилган юридик шахснинг ҳуқуқ ва бурчлари топшириш ҳужжатига мувофиқ ўтади (ФКнинг 50-моддаси).
Бу солиқларни тўлашга оид мажбуриятларга ҳам тааллуқлидир. Шу тариқа, «А» корхонаси солиқларни тўлашдан озод этилган 5 йиллик муддат тугаганлиги сабабли «Б» корхонаси солиқ тўлаши лозим.
Жавобни «Norma» МЧЖ экспертлари тайёрладилар.
