Компаниямиз ишлаб чиқариш фаолияти билан шуғулланади. Божхона юк декларациясининг 45-устунида кўрсатилган 2019 йил февралда Хитойдан импорт қилинган металл рулонлар қиймати 2,7 баравар ошириб ҳисобланган ва ушбу нархдан ҚҚС суммаси чиқарилган. Корхонамиз эркин иқтисодий зона иштирокчиси бўлганлиги сабабли ҚҚС ҳисобга олинган ва «0» деб қайд этилган. Зарур талабларни бажара олмаётганлигимиз сабабли ЭИЗдан чиқмоқчимиз.
Имтиёзлар бекор қилинса, ҚҚСни 2,7 баравардан юқори миқдорда тўлаймизми?
Божхона юк декларациясини қайта расмийлаштириш учун нима қилишимиз керак?
– Имтиёз туфайли товар озод этилган тўланиши лозим бўлган божхона тўловлари, шу жумладан ҚҚСни тўлашга тўғри келади.
Ҳақиқатан ҳам, ЭИЗ иштирокчилари ўз ишлаб чиқариш эҳтиёжлари учун олиб кириладиган ускуналар, хом ашё, материаллар ҳамда бутловчи буюмлар божхона тўловларидан (божхона расмийлаштируви йиғимларидан ташқари) озод этилади (26.10.2016 йилдаги ПФ-4853-сон Фармоннинг 3-банди).
Божхона имтиёзлари фақат ЭИЗ иштирокчисининг инвестор ва ЭИЗ Дирекцияси ўртасида тузилган ЭИЗ ҳудудида инвестициялаш тўғрисидаги шартномада назарда тутилган фаолият турига татбиқ қилинади. Уларни қўллаш муддати ЭИЗ иштирокчисига гувоҳнома берилган кундан бошлаб ҳисобланади (Низомнинг 5-банди, ВМнинг 10.04.2017 йилдаги 196-сон қарорига 3-илова).
ЭИЗ иштирокчилари ҳар йили 25 январга қадар давлат солиқ ва божхона хизмати органларига ўз ишлаб чиқариш эҳтиёжлари учун четдан олиб келинган асбоб-ускуналар, хом ашё, материаллар ва бутловчи буюмларнинг ишлатилганлиги тўғрисидаги декларацияни Низомга 2-иловага мувофиқ шакл бўйича тақдим қиладилар (Низомнинг 18-банди).
Улар олиб келинган кундан бошлаб 3 йил ичида сотиб юборилган ёки бепул берилган тақдирда, божхона тўловлари қонун ҳужжатларида белгиланган тартибга мувофиқ тўлиқ миқдорда ундирилади (Низомнинг 19-банди).
Тадбиркорлик субъекти ЭИЗ иштирокчиси мақомидан маҳрум бўлганда, у ЭИЗ иштирокчиси мақомидан маҳрум қилинган ойдан кейинги ойнинг 1-кунидан ЭИЗ иштирокчиларига берилган имтиёзлар ва преференциялардан фойдаланмайди (Низомнинг 6-банди).
Қийматга тузатиш киритиш
Сизнингча, божхона тўловлари миқдори нотўғри белгиланган ҳолатларда, товарнинг божхона қийматига ва (ёки) божхона тўловларига тузатишлар киритиш мақбул бўлади. Тузатиш товар чиқарилганидан кейин ҳам қуйидаги ҳолатларда амалга оширилиши мумкин:
● товарни декларациялашда содир этилган, товарнинг божхона қиймати ва (ёки) божхона тўловларининг миқдорига таъсир кўрсатган техник хатолар аниқланган бўлса;
● божхона тўловларининг суммалари қайтарилишига ёки қўшимча тўланишига олиб келадиган ёки товарнинг божхона қиймати миқдорига таъсир кўрсатган бошқа асослар юзага келган бўлса.
Фақат божхона қийматига ва (ёки) божхона тўловларига тузатишлар киритилаётган товарга нисбатан тузатиш амалга оширилади (Божхона кодексининг 320-моддаси). Тузатиш киритиш шакли, шунингдек Ўзбекистон божхона чегараси орқали олиб ўтиладиган товарга нисбатан уни тўлдириш тартиби Товарнинг божхона қийматига ва (ёки) божхона тўловларига тузатишлар киритишни тўлдириш тартиби тўғрисидаги йўриқномада (АВ томонидан 14.03.2017 йилда 2867-сон билан рўйхатдан ўтказилган) белгиланган.
Тузатишдаги маълумотларни қайд этиш учун Божхона юк декларациясини тўлдириш тартиби тўғрисидаги йўриқномада (АВ томонидан 6.04.2016 йилда 2773-сон билан рўйхатдан ўтказилган) келтирилган таснифлагичлар қўлланилади.
«Божхона» бўлимини махсус мухбиримиз Гулнора АБДУНАЗАРОВА олиб боради.
