1. Импорт шартномаси бўйича товар 1 октябргача ИМ-70 режимида олиб кирилган, у 1 октябрдан кейин ИМ-40 режимига расмийлаштирилди.
Унга 15%лик ҚҚС қўлланиладими?
2. Августда тузилган импорт шартномаси бўйича бутловчи буюмларни октябрда олиб кирдик, бироқ ой охиригача божхонадан ўтказишга улгурмасак керак. Сертификатни расмийлаштириш лозим.
Биз қайси ойдан ҚҚС тўловчиси ҳисобланамиз?
|
1 |
Вақтинча сақлаш божхона режими (ИМ-70) шундай режимки, бунда божхона ҳудудига олиб кирилган ҳар қандай товар тайинланган божхона органига тақдим этилган пайтдан бошлаб ва танланган божхона режимига мувофиқ чиқариб юборилгунига қадар божхона тўловлари тўланмаган ҳамда иқтисодий сиёсат чоралари қўлланилмаган ҳолда вақтинча божхона назорати остида сақланиши мумкин (Божхона кодексининг 83-моддаси).
Товарнинг вақтинча сақлаш божхона режимида туриш муддати ана шу товарнинг мазкур божхона режимига жойлаштирилишини маълум қилган ваколатли шахс томонидан белгиланади, лекин бу муддат 60 календарь кундан ошмаслиги лозим (Божхона кодексининг 85-моддаси). Тегишинча, ушбу муддат мобайнида товарни божхонадан ўтказиш, сизнинг ҳолатда уни эркин муомалага чиқариш божхона режимига (импорт) жойлаштириш лозим.
Товар божхона тўловлари тўланиши ва иқтисодий сиёсат чора-тадбирларига риоя этилиши шарти билан божхона ҳудудида эркин муомалада бўлган товар мақомини олади. Товарлар эркин муомалага чиқариш учун божхона режимига (импорт) жойлаштирилганда божхона органига БЮДни тақдим этиш орқали декларацияланади. Тегишинча, унда кўрсатилган божхона тўловлари миқдори божхона декларацияси қабул қилинган санадаги қонун ҳужжатларида белгиланган ставкаларга мувофиқ келиши лозим. У 1 октябрдан кейин қабул қилинган бўлса, ҚҚС 15% миқдорида ундирилади.
|
2 |
2019 йил 1 октябрдан товарларни импорт қилувчи тадбиркорлик субъектлари, товарларни (ишларни, хизматларни) сотишдан тушум миқдоридан қатъи назар, ҚҚС тўловчилари ҳисобланиши тўғрисидаги норма амал қилмоқда. Бу Президентнинг «Солиқ ва божхона имтиёзлари берилишини янада тартибга солиш чора-тадбирлари тўғрисида»ги Фармонида (27.06.2019 йилдаги ПФ-5755-сон) назарда тутилган.
Сизнинг мурожаатингиздан кўриниб турибдики, импорт шартномаси 1 октябргача тузилган, товар эса октябрда олиб кирилган. Мазкур ҳолатда ҚҚСга ўтиш вақти импорт шартномаси тузилган сана эмас, балки товар Ўзбекистон божхона чегарасини кесиб ўтган сана ҳисобланади.
Маълумот учун. Товарларни импорт қилувчи, шу жумладан биринчи марта импорт қилувчи тадбиркорлик субъектлари импорт шартномаси тузилган ойдан кейинги ойнинг 1 санасидан бошлаб ҚҚС тўловчиси сифатида ҳисобга туриши шарт (ПФ-5755-сон Фармоннинг 2-банди «б» кичик банди).
«Божхона» бўлимини махсус мухбиримиз Гулнора АБДУНАЗАРОВА олиб боради.
