Биз Англия ва Эрондаги сотувчи компаниялар билан Белоруссия, Қозоғистон ёки эркин савдо зонасига кирадиган бошқа мамлакатда ишлаб чиқарилган ва юклаб жўнатилган товарларни етказиб беришга контрактлар тузиш ниятидамиз. Товарнинг келиб чиқиш сертификатига эга бўлган ўзбекистонлик юк олувчи божхона божини тўлайдими? Ушбу масала бўйича меъёрий ҳужжатни топа олмаяпман.
Алишер А.
– Импорт божхона тўловларини ҳисоблаш ва ундириш тартибининг1 (бундан кейин – Тартиб) 3.3-бандига кўра, Ўзбекистон Республикаси эркин савдо зонасини барпо этиш тўғрисидаги келишувга эга бўлган мамлакатларда2 ишлаб чиқарилган товарларга нисбатан божлар қўлланилмайди, агар товар мазкур келишув иштирокчиси бўлган давлатлардан бирининг резиденти томонидан экспорт қилинса ва мазкур келишув иштирокчиси бўлган давлат резиденти томонидан келишув иштирокчиси бўлган бошқа давлатнинг божхона ҳудудидан олиб кирилса (олиб қўйишлар тўғрисидаги баённомаларга киритилган товарлардан ташқари). Бунда резидент дейилганда ушбу давлат ҳудудида ташкил этилган ташкилот ёки ушбу давлат ҳудудида доимо яшовчи жисмоний шахс тушунилади. Бунинг маъноси шуки, битимнинг барча иштирокчилари (сотувчи, ишлаб чиқарувчи, харидор) келишув иштирокчиси бўлган мамлакатларнинг резидентлари бўлишлари керак.
Бироқ шуни билишингиз лозимки, Тартибнинг 3.2-бандига мувофиқ белгиланган ставкалар ҳажмидаги божлар, товарни жўнатувчи мамлакатдан ва экспортчидан қатъи назар, Ўзбекистон савдо-иқтисодий муносабатларда энг яхши қулайлик режимини қўллайдиган мамлакатларда ишлаб чиқарилган товарларга нисбатан қўлланилади.
Буюк Британия Энг яхши қулайлик режими тақдим этиладиган савдо-иқтисодий ҳамкорлик тўғрисидаги битимлар имзоланган мамлакатлар рўйхатига3 киритилган. Тегишинча «А» шаклидаги келиб чиқиш сертификати тақдим этилганда божхона божи бир баравар миқдорда олинади.
Эрон ҳам Рўйхатда кўрсатилган. Бироқ у билан боғлиқ ҳолатда энг яхши қулайлик режими Тошкент шаҳрида 2005 йил 4 январда имзоланган, 17.06.2003 йилдаги Ўзбекистон Республикаси Ҳукумати билан Эрон Ислом Республикаси Ҳукумати ўртасидаги ички савдода преференциялар бериш бўйича ўзаро тушуниш меморандумига Ижро баённомасига 2-иловада кўрсатилган товарларгагина қўлланилади.
Энг яхши қулайлик режими тақдим этиш тўғрисидаги келишувлар имзоланмаган мамлакатлардан келиб чиқувчи товарларга нисбатан импорт божхона божларининг икки баравар миқдоридаги ставкалари қўлланади.
1ТИАВ, МВ ва ДБҚ томонидан тасдиқланган, АВ томонидан 27.07.1999 йилда 782-сон билан рўйхатдан ўтказилган.
2Эркин савдо режимини назарда тутадиган келишувлар имзоланган Эркин савдо зонасини барпо этиш тўғрисидаги келишув иштирокчи давлатларининг рўйхатига каранг. (ТИАВ, МВ ва ДБҚ томонидан тасдиқланган, АВ томонидан 8.04.1998 йилда 429-сон билан рўйхатдан ўтказилган).
3ТИАВ, МВ ва ДБҚ томонидан тасдиқланган, АВ томонидан 8.04.1998 йилда 426-сон билан рўйхатдан ўтказилган.
«Божхона» бўлимини махсус мухбиримиз Гулнора АБДУНАЗАРОВА олиб боради.
